काठमाडौं- हास्य कलाकार किरण केसी ‘राता मकै’ उपनामले परिचित छन् । उनै केसीले ‘राता मकै’को नाममा प्रवेशद्धार निर्माण गरेका छन् । 

कलाकारितासँगै विभिन्न सामाजिक काममा सक्रिय किरणले ललितपुर इमाडोलमा रहेको ‘राता मकै’ चोकमा गेट निर्माण गरेका हुन् । ‘रात मकै’ गेटलाई आइतवार बिहान ललितपुरस्थित लक्ष्मी नगरपालिकाका मेयर रामेश्वर श्रेष्ठ र महजोडी अर्थात वरिष्ठ हास्य कलाकार मदनकृष्ण श्रेष्ठ र हरिवंश आचार्यले संयुक्त रुपमा उद्घाटन गरेका हुन् ।

उद्घाटनका क्रममा मेयर श्रेष्ठले किरणले उदाहरणीय काम गरेको बताए । उनले भने, ‘आफ्नो ठाउँलाई आफैंले बनाउनुपर्छ । किरणजीको विकास निर्माणको पाटो अन्य कलाकारको लागि पनि प्रेरणा बन्नेछ ।’

यसैगरी वरिष्ठ कलाकार मदनकृष्ण श्रेष्ठले किरणको जाँगरको प्रशंसा गरे । उनले भने, ‘किरण निकै फुर्तिलो छ । हरेक काम समयमा सकाउँछ ।’

त्यस्तै वरिष्ठ कलाकार हरिवंश आचार्यले पनि किरणले स्थानीय तहमा गरेको समाज सेवा उदाहरणीय रहेको बताए । ‘उसले यहाँ स्कूलको भवन बनाएको छ । प्रहरी भवन बनाएको छ,’ हरिवंशले भने, किरणको यस्तै कामले उसलाई देश विदेशमा मात्र होइन स्थानीय तहमा पनि लोकप्रिय बनाएको छ ।’ 

किरणले सोही स्थानमा मन्दिर, सडक, भवन, आमाबुवाको नाममा महेन्द्र आदर्श स्कूलको दुई भवन र इमाडोल प्रहरी भवन निर्माण गरिसकेका छन् । उनले प्रहरी भवन आफ्नै अध्यक्षतामा निर्माण गरेर हस्तान्तरण गरेका थिए । 

झन्डै १२ वर्ष अगाडि नामांकन भएको ‘राता मकै’ चोक र त्यहाँको ‘राता मकै’ मार्गले आफूलाई गेट बनाउन प्रेरित गरेको किरणले बताए । ‘यहाँ मैले विभिन्न स्थानमा आफूले सक्दो विकास निर्माणमा हातेमालो गरिरहेको छु । त्यसैले यहाँ गेट आवश्यक देखेकोले निर्माण गरेको हुँ’ किरणले भने, ‘यहाँ राज्यले नै रातामकै मार्ग नामांकन गरिसकेपछि मेरो यो दायित्व पनि हो ।’ 

उनले झन्डै ६ लाख रुपैयाँको लागतमा बुवा दुर्गा बहादुर केसी र आमा इन्द्र कुमारी केसीको सम्झनामा गेट निर्माण गरेको बताए । किरणले आउँदा दिनमा पनि आफू समाज सेवामा सक्रिय रहने बताए ।