यसपालिको क्रिकेट विश्वकप इंग्ल्यान्डले जित्न सक्छ : रिकी पोन्टिङ

जेठ ६, २०७६

काठमाडौं – आईसीसी क्रिकेट विश्वकप शुरू हुन लागेको छ र त्यसमा भाग लिने सबै १० टीमले आफ्नो सर्वोत्कृष्ट टोली र रणनीति बनाइरहेका छन् ।

यसपालिको विश्वकप कसले जित्ला भनी अनेकथरी अनुमानहरू आइरहेका छन् । 


ADVERTISEMENT

यसै क्रममा अस्ट्रेलियाका पूर्व कप्तान रिकी पोन्टिङले यसपालि इंग्ल्यान्डको चान्स उच्च रहेको बताएका छन् ।

इंग्ल्यान्डले अहिले कप्तान इयोज मोर्गनको नेतृत्वमा एकदिवसीयमा अद्भुत खेल प्रदर्शन गरिरहेको छ । विगत दुई वर्षयता इंग्ल्यान्डको टोली निकै बलियो भएर आएको छ । 

इंग्ल्यान्डको ब्याटिङ निकै खतरनाक छ र जुनसुकै बलिङ आक्रमणलाई पनि रुवाउन सक्ने क्षमता राख्छ । आफ्नै गृहमैदानका फ्ल्याट पिचमा जित्ने आशा इंग्ल्यान्डले पालेको छ । 

दुईपटक अस्ट्रेलियालाई विश्वकप जिताएका पोन्टिङले इंग्ल्यान्डको हालैको फर्म र गृहमैदानको फाइदाका कारण अरूभन्दा निकै अगाडि रहेको बताएका छन् । 

‘म दुई कारणले गर्दा इंग्ल्यान्ड छान्छु । इंग्ल्यान्डले एकदिवसीयमा अहिले निकै राम्रो खेल्न थालेको छ र विश्वकप पनि इंग्ल्यान्डमै हुन लागेको छ । त्यसैले उनीहरूलाई फाइदा हुन्छ नै । तर उनीहरूलाई भारत र अस्ट्रेलियाले चुनौती दिनेछन् ।’

हालै उसले पाकिस्तानलाई पाँच एकदिवसीय खेलको शृंखलामा ४० ले हराएको थियो र प्रत्येक खेलमा ३०० भन्दा बढी रन बनाएको थियो ।

यसपालिको विश्वकप राउन्ड रोबिन फर्म्याटमा खेलिनेछ । यसको अर्थ हुन्छ, प्रत्येक टीमले सबै नौवटै टीमसँग कम्तीमा एकपटक भिड्नुपर्नेछ । 

इंग्ल्यान्डको सम्भावना भए पनि अरू बलिया टीमले उनीहरूलाई हराउन सक्ने पोन्टिङको भनाइ छ । 

अस्ट्रेलियामा स्टिभ स्मिथ र डेभिड वार्नर फर्किएकाले उनीहरू पनि निकै खतरनाक टोली बनेको पोन्टिङले टिप्पणी गरे ।

एजेन्सी 

जेठ ६, २०७६ मा प्रकाशित

प्रतिक्रिया दिनुहोस