विवेक ओबरोयले हटाए ऐश्वर्या सम्बन्धी मिम, मागे माफी

जेठ ७, २०७६

काठमाडौं – एक्जिट पोललाई ऐश्वर्या राय बच्चनसँग जोडेर बनाइएको मिम शेयर गरेपछि कठोर आलोचना खेपेका बलिउड अभिनेता विवेक ओबरायले मंगलवार बिहान माफी मागेका छन् । यससँगै उनले मिम पनि डिलिट गरेका छन् । 

विवेक एकैचोटि दुईवटा ट्वीट गरे । उनले लेखे, ‘कहिलेकाहीँ कसैलाई शुरूमा हेर्दा रमाइलो र हानिरहित लाग्ने कुरा अरूलाई त्यस्तो नलाग्ला । मैले विगत १० वर्ष दुई हजारभन्दा बढी असहाय बालिकाको सशक्तीकरणमा बिताएको छु । म कहिले पनि महिलाको अपमान गर्ने बारेमा सोच्दिनँ ।’


ADVERTISEMENT

 

अर्को ट्वीटमा उनले लेखे, ‘मिममा मेरो रिप्लाईले एक महिला पनि आहत भइन् भने यसमा सुधार गर्नुपर्छ । म माफी माग्छु । ट्वीट डिलिट गरेको छु ।’

सोमवार विवेक ओबरोयले तीन तस्वीरसहितको मिम आफ्नो ट्विटर ह्यान्डलमा शेयर गरेका थिए । मिमका तीन भाग ओपिनियन पोल, एक्जिट पोल र रिजल्टमा विभाजित थियो । ओपिनियन पोलमा ऐश्वर्या सलमान खानसँग, एक्जिट पोलमा विवेकसँग अनि रिजल्टमा अभिषेक बच्चन र आराध्यासँग देखिएकी थिइन् । 

उनको यो मिमको कठोर आलोचना भयो र राष्ट्रिय महिला आयोगले पनि महिला र बालिकाको अपमान भएको भन्दै विवेकलाई नोटिस पठायो ।

एएनआई समाचार संस्थासँग कुरा गर्दै विवेकले सोमवार भने, ‘मानिसहरूले यसलाई किन यति ठूलो मुद्दा बनाएका हुन् ? कसैले मलाई यो मिम पठाएको थियो । म हाँसें अनि उक्त व्यक्तिको रचनात्मकताको प्रशंसा गरें । तपाईंमाथि कोही हाँस्छ भने त्यसलाई गम्भीरतापूर्वक लिन हुँदैन ।’

एजेन्सी

जेठ ७, २०७६ मा प्रकाशित

प्रतिक्रिया दिनुहोस