काठमाडौं – बलिउड अभिनेता सलमान खानको फिल्म ट्युबलाइट अपेक्षा गरेभन्दा कम चलेको थियो । मानिसहरू उक्त पिल्म फ्लप भयो भन्दा सलमान अझै पनि रिसाउँछन् ।

ट्युबलाइटको नाम सुन्नेबित्तिकै सलमान सतर्क भइहाल्छन् । उनी ट्युबलाइट फ्लप फिल्म थिएन भनी तर्क गरिरहन्छन् । 

तर अहिले आएर चाहिँ सलमानले ट्युबलाइट फ्लप भएको स्वीकार्दै त्यसको कारण पनि दिए । उनले भने, ‘तपाईंलाई ट्युबलाइट चलेन जस्तो लाग्यो होला तर धेरै मानिसका लागि त्यो फिल्म चलेको हो । रिलिज चाहिँ गलत टाइममा गरियो जस्तो लाग्छ । त्यो एकदमै स्वीट र इमोसनल फिलम थियो । ह्युमर पनि थियो । मुटु छुने किसिमको फिल्म थियो । ईदको बेलामा मानिस भारतमा किक र दबंग जस्ता याक्सन फिल्म हेर्न मन पराउँछन् अनि हामी चाहिँ उनीहरूलाई इमोसनल फिल्म देखाइरहेका थियौं ।’

सलमानले थपे, ‘मानिसहरू ईदमा रमाइलोका लागि फिल्म हेर्न आउँछन् । फिल्म हेर्न गएका मानिस रुँदै रुँदै फर्किए र हाम्रो त ईद नै बिग्रियो भने । त्यसैले गर्दा हाम्रो फिल्म फ्लप भयो । अहिले पनि ट्युबलाइट टीभीमा आउँदा मानिसहरू मलाई फोन गरेर एकदम राम्रो फिल्म बनेको छ भन्छन् ।’

सलमान खान अहिले आफ्नो नयाँ फिल्म भारतको प्रमोसनमा लागेका छन् ।

एजेन्सी