आप र कांग्रेसका सांसद भित्र्याउने ध्याउन्नमा भाजपा

जेठ ७, २०७६

काठमाडौं – एक्जिट पोलमा सकारात्मक परिणाम आएपछि उत्साहित भारतीय जनता पार्टीको नेताहरूको नजर अब फेब्रुअरीमा हुने दिल्ली विधानसभा चुनावमा अडेको छ ।

बिहीवार लोकसभा चुनावको परिणाम आफ्नो पक्षमा आएमा दिल्लीमा भाजपाले आफ्नो अनुकूल वातावरण कायम राखिरहन तयारी थालेको छ । 


ADVERTISEMENT

भाजपाको सबभन्दा बढी ध्यान आम आदमी पार्टी (आप) विधायक र नेताहरूलाई आफ्नो पक्षमा ल्याउनुमा छ । कांग्रेसका पनि केही पूर्वमन्त्री, विधायक र वरिष्ठ नेतामाथि भाजपाको नजर छ । लोकसभा चुनावको परिणाम आएपछि दिल्लीमा सांसद तानातानको राजनीति चर्किने अपेक्षा छ । 

लोकसभा चुनावमा प्रचारका क्रममा भाजपा नेताहरूले आपका एक दर्जनभन्दा बढी विधायक आफ्नो सम्पर्कमा रहेको दाबी गरेका थिए । यसबीच आपका दुई विधायक भाजपामा प्रवेश पनि गरे । 

भाजपा सूत्रका अनुसार, आगामी १० देखि १५ दिनमा आपका अन्य विधायक पनि भाजपामा प्रवेश गर्नेछन् । अनि कांग्रेसका केही नेता पनि भाजपाका वरिष्ठ नेतासँग सम्पर्कमा छन् । 

लोकसभा चुनावपछि आपका कम्तीमा पाँच विधायकले भाजपाका शीर्ष नेतासँग सम्पर्क गरेर पार्टी प्रवेश गर्ने इच्छा व्यक्त गरेको भाजपा सूत्रहरूको दाबी छ । तर ती आप विधायकले आगामी चुनावमा आफूहरूलाई नै भाजपाले टिकट दिनुपर्ने माग राखिरहेका छन् । त्यसैका विषयमा कुरा अड्केको छ । 

पहिले नै आश्वासन दिएर कसैलाई पार्टीमा नलिने किनकि तमाम समीकरण हेरेर मात्र पार्टी नेतृत्वले टिकटमा निर्णय लिने नेताहरूको भनाइ छ । 

भाजपका एक वरिष्ठ नेताले बताए, ‘पार्टी प्रवेश गर्ने नेताहलाई टिकट दिन कुनै समस्या छैन । तर कसैले टिकटकै शर्तमा मात्र पार्टी प्रवेश गर्छु भन्यो भने चाहिँ त्यसलाई मानिने छैन । आप नेतालाई टिकट दिँदा कतै आफ्नो काडर वा नेता रिसाउने त हैनन् भनी भाजपाले आँकलन गरिरहेको छ ।’

अन्य पार्टीबाट आएका सबै नेतालाई टिकट दिन सम्भव नभएको नेताहरूको भनाइ छ । पार्टीले सबैका लागि ढोका खुला रहेको तर विवादास्पद छवि भएको व्यक्तिलाई प्रवेश नदिइने जनाएको छ ।

एजेन्सी
 

जेठ ७, २०७६ मा प्रकाशित

प्रतिक्रिया दिनुहोस