सुर्खेत- प्रमुख प्रतिपक्षी दल नेपाली कांग्रेसका नेता प्रकाशमान सिंहले संघीय सरकारका कारण मुख्यमन्त्रीहरूको रुवाबासी भइरहेको आरोप लगाएका छन् ।

नेपाली काँग्रेस जिल्ला कार्यसमिति सुर्खेतले आइतबार आयोजना गरेको कार्यकर्ता भेटघाट कार्यक्रमलाई सम्बोधन गर्दै उनले सरकारले संविधान उल्लंघन गर्दै गएकाले मुख्यमन्त्रीले अधिकार नपाएको बताएका हुन् ।

‘संघीय सरकारले प्रदेश सरकारलाई संविधानमा उल्लेख भए बमोजिमका कानूनहरू निर्माण नगरिदिएका कारण सरकारले गति लिन सकेका छैनन,' उनले भने, ‘सरकारले संविधानको भावना र मर्म अनुसार तत्काल मुख्यमन्त्रीहरूलाई अधिकार हस्तान्तरण गर्नुपर्छ ।’

दुइतिहाईको दम्भका कारण सरकारले संविधान विपरित कार्य गर्दै गइरहेको उनको आरोप छ । ‘सरकार दुइ तिहाईको दम्भमा मस्त छ,'  उनले भने, ‘संविधान अनुरूप सरकार जाओस् । नभए सरकारलाई ठीक बाटोमा हिँडाउन हामी तयार छौं । हामी सही बाटो हिँडाउन सरकारलाई बाध्य बनाउनेछौं ।’

उनले टेलिकम, वाइडबडी काण्ड जस्ता घटनाको बारेमा सरकारले तत्काल तथ्यहरू सार्वजनिक गर्नुपर्ने माग गरे । ‘संसदको लेखा समितिले पेश गरेको वाइडबढी घोटालाको बारेमा अख्तियार के गरिरहेको छ ? टेलिकममा भएको भ्रष्टाचारको छानविन कहाँ पुगेको छ ?’ सरकारलाई प्रश्न गर्दै उनले भने, ‘जुनसुकै काण्डमा जो मुछिएपनि दोषी पत्ता लगाई कारवाही गर्नेपर्छ । सरकारले यसबारेमा बेलैमा सोचोस् ।’