काठमाडौं – विश्वकप क्रिकेटमा बुधवार अस्ट्रेलिया र पाकिस्तानबीच भिडन्त हुँदैछ । यी दुवै टोलीले यस प्रतियोगितामा एक जीत र एक हार बेहोरेका छन् । सेमिफाइनल पुग्ने आशा राखेका दुवै टोलीले आजको खेल जित्नैपर्ने अवस्था छ । 

अस्ट्रेलियाले भारतसँग हार्दा उसका कमीकमजोरीहरू उजागर भएका थिए । उता पाकिस्तानले इंग्ल्यान्डविरुद्धको खेल जितेर आत्मविश्वास उच्च बनाएको छ भने श्रीलंकाविरुद्धको उसको खेल वर्षाका कारण रद्द भयो । 

यी दुई टोलीको निकट इतिहास हेर्ने हो भने आजको खेलमा पाकिस्तानले जित्ने सम्भावना न्यून छ । तर पाकिस्तानी टोलीको पूर्वानुमान गर्नै सकिँदैन । इंग्ल्यान्डविरुद्धको खेलमा जस्तो प्रदर्शन दोहोर्‍याएमा पाकिस्तानले अस्ट्रेलियालाई हराउन सक्छ । आजको खेल जितेमा पाकिस्तानलाई भारतविरुद्धको अर्को खेलमा उच्च आत्मविश्वासका साथ ओर्लन सहज हुन्छ । 

अस्ट्रेलियाले चाहिँ आफू उपाधिको दाबेदार हुँ प्रमाणित गर्नका लागि आजको खेलमा उच्चस्तरीय प्रदर्शन गर्न जरूरी छ । उनीहरूले आज कस्तो गेमप्लान बनाउँछन् भनी हेर्न रोचक हुनेछ । मार्कस स्टोइनिस घाइते भएकाले अस्ट्रेलियाको ब्याटिङ अर्डरको सन्तुलन गडबडाएको छ । 

टाउनटनको मैदानमा बाउन्ड्रीहरू छोटा छन् अनि मौसम पनि सफा नहोला जस्तो छ । यो सबैको अर्थ हुन्छ, टस जितेमा बलिङ गर्नु नै उपयुक्त हुन्छ । 

डेभिड वार्नरले रन बनाइरहेका छन् तर उनले तीव्र गतिमा भने रन बनाउन आवश्यक छ । भारतविरुद्ध ३५३ रन बनाउनुपर्ने अवस्थामा वार्नरले ढिलो गतिमा रन बनाइदिँदा अस्ट्रेलियालाई गाह्रो भइदियो । 

पाकिस्तानको कुरा गर्दा वहाब रियाजको बलिङले आजको म्याचको परिणाम निर्धारित गर्न सक्छ । इंग्ल्यान्डविरुद्ध उनले ८२ रन लुटाएको भए पनि तीन विकेट लिएर उनले आफ्नो टोलीलाई विजयी बनाए । वेस्ट इन्डीजका बलरहरूका बाउन्सरले अस्ट्रेलियाको टप अर्डरलाई तर्साएको देखिएकाले वहाबले उनीहरूबाट प्रेरणा लिन सक्छन् ।

स्टोइनिस घाइते भएकाले उनको ठाउँमा शन मार्शलाई ल्याइने सम्भावना छ । 

अस्ट्रेलियालाई स्पिनले अत्याउने रणनीति पाकिस्तानले बनाउन सक्छ । त्यसो हो भने इमाद वसिमले अवसर पाउन सक्छन् । वहाबको पेस र शाहीन अफ्रिदीको स्विङमध्ये एकलाई छान्न चाहिँ पाकिस्तानलाई दुविधा छ । ब्याटिङ अर्डर भने इंग्ल्यान्डविरुद्धकै खेलमा जस्तो हुने सम्भावना छ । 

त्यसो त टाउन्टनमा टन्नै रन बन्ने गर्छ तर बादल लाग्ने र हल्का बर्सात पनि हुने सम्भावना रहेकाले फास्ट बलरले खेलको परिणाम निर्धारित गर्ने देखिन्छ ।

एजेन्सी