मुद्दाको दोषीलाई चीनसमक्ष सुपुर्दगी गर्ने हङकङ सरकारको योजनाविरुद्ध सडकमा ओर्लिए जनता

जेठ २९, २०७६

काठमाडौं – चीनसमक्ष सुपुर्दगी गर्ने अनुमति दिने सरकारको योजनाविरुद्ध मध्य हङकङमा हजारौं प्रदर्शनकारीहरूले विरोध प्रदर्शन गर्दै दुई मुख्य राजमार्गमा बाधा गरेका छन् । 

सन् १९९७ मा हङकङ चीनमा गाभिएपछि पहिलोपटक यति ठूलो प्रदर्शन भइरहेको हो । कालो कपडा लगाएका हजारौं प्रदर्शनकारीहरूले तगारो तेर्स्याएर दुईवटा सडक अवरुद्ध पारे जसले गर्दा यातायात ठप्प भयो । 


ADVERTISEMENT

संशोधन गरिएको कानून अन्तर्गत कसूर ठहर भएका अनि सात वा त्यसभन्दा बढी कारावास सजाय पाएका आरोपितहरूलाई चीनसमक्ष सुपुर्दगी गरिन सक्नेछ । कानूनले क्षेत्रीय स्वायत्ततालाई प्रभावित पार्ने भनी विरोध भइरहेको छ । 

संशोधित विधेयकका समर्थकहरू हङकङ शहर अपराधीहरूको आश्रयस्थल नबनोस् भन्नका लागि यसलाई ल्याइएको जिकिर गर्छन् । 

विधेयकका आलोचकहरू चाहिँ चीनले राजनीतिक विरोधी तथा अन्यलाई सुपुर्दगी गर्नमा यस कानूनको प्रयोग गर्ने चिन्ता व्यक्त गरिरहेका छन् । संशोधित विधेयकमा प्रक्रियागत सुरक्षाको अभावले हङकङको स्वायत्ततालाई कमजोर बनाउन सक्ने उनीहरूको भनाइ छ । मानवअधिकार, मौलिक स्वतन्त्रता र लोकतान्त्रिक मूल्यको सुरक्षामा यसले प्रतिकूल असर पार्न सक्ने उनीहरू आशंका गर्छन् । 

प्रहरीले बुधवार विधेयकमाथिको बहसभन्दा केही घन्टाअघि प्रदर्शनकारीहरूलाई तितरबितर बनायो । हङकङमा १०० भन्दा बढी व्यापारीहरूले प्रदर्शनकारीप्रति ऐक्यबद्धता जनाउन बुधवार आफ्नो संस्था बन्द गरेका छन् । विद्यार्थी संगठनहरूले जुलुसमा सहभागी हुन कक्षा बहिष्कार गरेका छन् ।

एजेन्सी

जेठ २९, २०७६ मा प्रकाशित

प्रतिक्रिया दिनुहोस