काठमाडौं – भारतको बिहार राज्यस्थित मुजफ्फरपुरमा एक्युट इन्सेफलाइटिस सिन्ड्रोम (एईएस) ज्वरोका कारण मर्ने बालबालिकाको संख्या ५४ पुगेको छ ।

श्रीकृष्ण मेडिकल कलेज यान्ड हस्पिटलमा मात्र ४६ बालबालिका बितिसकेका छन् । अनि केजरीवाल मातृ सदनमा आठ बालबालिकाको मृत्यु भएको छ ।

जनवरी महिनादेखि १७९ वटा एईएसको मामिला आएका छन् । यसक्रममा यी बालबालिकाको मृत्युमा लिच्ची कारण हो कि भन्ने प्रश्न पनि उठेको छ । 

मृत्युको कारण जाँच्नका लागि स्वास्थ्य विशेषज्ञहरूको सात सदस्यीय टोली केन्द्रबाट मुजफ्फरपुर पुगेको छ । स्वास्थ्य विभागका अधिकारीहरूले धेरेजसो मृत्यु हाइपोग्लाइसिमिया अर्थात् शरीरमा चिनीको कमीका कारण भएको बताएका छन् । 

चर्को गर्मी र पानी नपरेका कारण यो रोग लागेको बताइएको छ । 

पहिलेका केही रिपोर्टमा चाहिँ केही स्वास्थ्य विशेषज्ञले एईएसका कारण लिच्ची नै कारण रहेको बताएका थिए । मुजफ्फरपुर नजिक फलाइने लिच्चीमा विषालु तत्त्व भएकाले रोग लागेको र मृत्यु भएको बताइएको छ । 

गर्मीको बेलामा उक्त क्षेत्रमा गरीब परिवारका बालबालिकाले बिहानै लिच्ची खाने गरेका छन् । लिच्चीले बालबालिकामा घातक मेटाबोलिक रोग उत्पन्न गर्छ जसलाई हाइपोग्लाइसिमिया इन्सेफेलोप्याथी भनिन्छ । लिच्चीमा मिथाइल साइक्लोप्रोपाइल ग्लाइसिन नामक रसायन पनि हुन्छ । 

लामो समयसम्म भोको बस्दा अनि पोषणको कमी हुँदा शरीरमा चिनीको स्तर घट्छ र मस्तिष्क प्रभावित हुन्छ । बिहारका स्वास्थ्य अधिकारीहरूले बालबालिकालाई खाली पेट लिच्ची नखुवाउन र आधा पाकेको लिच्ची नखान आमाबुवालाई सल्लाह दिएका छन् ।

एजेन्सी