काठमाडौं – विश्वकप क्रिकेटको २५औं म्याचमा बुधवार दक्षिण अफ्रिका न्युजील्यान्डसँग भिड्दैछ । 

बर्मिंघममा हुने यो प्रतिस्पर्धा अफ्रिकाको छैठौं र न्युजील्यान्डको पाचौं म्याच हो । अंकतालिकामा दक्षिण अफ्रिका आठौं स्थानमा छ । उससँग जम्मा ३ अंक छ । 

न्युजील्यान्ड सात अंकका साथ तेस्रो स्थानमा छ । 

दक्षिण अफ्रिकाले सेमिफाइनलमा स्थान बनाउन आजको म्याच जित्नैपर्ने बाध्यता छ । 

तर फाफ डुप्लेसीको टीमका लागि म्याचमा दुई अंक हासिल गर्न सहज छैन । पछिल्ला आँकडा उसका पक्षमा छैनन् । न्युजील्यान्डविरुद्ध उसले सन् १९९९ पछि विश्वकपमा कुनै पनि खेल जितेको छैन । 

त्यसमाथि दक्षिण अफ्रिका अहिले फर्ममा छैन । बंगलादेशले समेत उसलाई हराएको छ । उसले अफगानिस्तान जस्तो कमजोर टीम विरुद्ध मात्र जीत हासिल गरेको छ । 

यी दुई टोलीबीच अहिलेसम्म ४१ म्याच भएका छन् । तिनमा दक्षिण अफ्रिका ४१ वटामा विजयी भएको छ भने न्युजील्यान्डले २४ वटामा मात्र सफलता प्राप्त गरेको छ । विश्वकपमा चाहिँ न्युजील्यान्ड पाँचवटामा अनि दक्षिण अफ्रिका दुईवटामा विजयी भएका छन् । इंग्ल्यान्डमा भएको एक मात्र भिडन्तमा सन् १९९९ मा दक्षिण अफ्रिका विजयी भएको थियो । 

बर्मिंघममा दिनभरि पानी पर्ने सम्भावना छ । म्याचका बेलामा बादल लाग्नेछन् । तापक्रम १२ देखि १५ डिग्री सेल्सियस रहनेछ । 

यस मैदानमा भएका ५१ एकदिवसीयमा २४ पटक पहिले ब्याटिङ गर्ने टीम विजयी भएको छ । विगत पाँच एकदिवसीयमा औसत स्कोर २९५ बनेको छ । 

दक्षिण अफ्रिकामा क्विन्टन डिकक र इमरान ताहिर फर्ममा छन् । डिककले १८६ रन बनाएका छन् भने ताहिरले आठ विकेट लिएका छन् । 

तर हाशिम अमला फर्ममा छैनन् । ओपनिङ ब्याट्स्म्यानहरूले राम्रो प्रदर्शन गर्नुपर्ने आवश्यकता छ । 

न्युजील्यान्डको कुरा गर्दा अनुभवी ब्याट्स्म्यान रोस टेलर फर्ममा छन् । उनले ६५ को औसतमा रन बनाएका छन् । उनीबाट आज ठूलो पारीको अपेक्षा छ । 

बलरहरूमा लोकी फर्गुसन आठ विकेट, म्याट हेनरी सात विकेट र जेम्स नीशम ६ विकेटका साथ राम्रो फर्ममा छन् । दक्षिण अफ्रिकी ब्याट्स्म्यानलाई यी तीनले अत्याउने देखिन्छ । 

न्युजील्यान्ड टीममा दुई स्पिनर मात्र छन् ः मिसेल स्यान्टनर र ईश सोढी । सोढीले यस विश्वकपमा खेल्ने मौकै पाएका छैनन् । स्यान्टनरले जम्मा दुई विकेट लिएका छन् । 

एजेन्सी