काठमाडौं – भारतको सुन्दर हिल स्टेसन औलीमा गुप्ता बन्धुहरूको विवाह समारोह शुरू भएको छ । 

विवाह समारोह पाँच दिनसम्म अर्थात् मंगलवारदेखि शनिवारसम्म चल्नेछ । यो भव्य विवाहको चर्चा संसारभरि भइरहेको छ । विवाहमा २०० करोड भारु खर्च गरिएको बताइएको छ । 

उत्तराखण्डको प्रसिद्ध स्कीइङ रिसोर्टमा बिहे भइरहेको हो । अतिथिहरूका लागि पाँचतारे होटलको व्यवस्था गरिएको छ । 

बिहेका लागि बाहुबली फिल्मको जस्तो भव्य सेट तयार पारिएको छ । उद्योगपति अजय गुप्ताका छोरा सूर्यकान्तको बिहे २० जुनमा र उनका भाइ अतुल गुप्ताको छोरा शशांकको बिहे २२ जुनमा हुनेछ । 

सूर्यकान्तको बिहे हीरा व्यापारी सुरेश सिंघलकी छोरी कृत्तिका सिंघल र शशांकको बिहे दुबईका व्यापारी विशाल जालानकी छोरी शिवांगीसँग हुँदैछ । 

बिहेमा सजावटका लागि भव्य सेटमा प्राचीन खम्भा र ठूलो घन्टा देखिन्छ । 

मनमोहक फूल स्विट्जरल्यान्डबाट मगाइएको छ । यसमा लगभग पाँच करोड भारु खर्च गरिएको छ ।

एजेन्सी