धनगढी – सुदूरपश्चिमको प्रदेश प्रमुख कार्यालय पछिल्लो ८ महिनादेखि प्रमुखविहीन बनेको छ ।

लामो समयदेखि उपसचिवको भरमा चल्दै आएको कार्यालयमा कार्यरत उपसचिव समेत सरुवा भएपछि हाल कार्यालय अस्तव्यस्त बनेको छ ।

प्रदेश प्रमुखको कार्यालयमा १ जना सचिव, २ जना उपसचिवसहित १९ जना कर्मचारीको दरबन्दी छ । तर सचिव र उपसचिव सरुवा भएपछि कार्यालयको कामकारवाही प्रभावित हुँदै आएको नायव सुब्बा शिवराज जोशीले बताए ।

‘महिनौंदेखि अभिभावकविहीन छौं । फुर्सदिला छौं भन्न मिलेन । सामान्य चिठ्ठीपत्रबाहेक केही काम हुँदैन । आर्थिक गतिविधि शून्य प्रायः छ । तलब खान पनि आपत् छ,’ उनले भने ।

७ जना शाखा अधिकृतको दरबन्दी रहेको कार्यालयमा हाल ३ जना शाखा अधिकृत, ३ जना नायव सुब्बा, ३ जना कार्यालय सहयोगी र ३ जना चालक मात्रै रहेका छन् ।

नासु जोशीका अनुसार कार्यालयका सचिव युवराज सुवेदी कात्तिक महिनामा नै सरुवा भएर गए । त्यसपछि उपसचिवको भरमा चलेको कार्यालयका उपसचिव हिरालाल चौधरी इलाका प्रशासन कार्यालय टीकापुरमा र अर्का उपसचिव पदम निधि सोती वैशाखदेखि थारु आयोगमा सरुवा भएपछि काम कारवाही प्रभावित हुँदै आएको हो । 

प्रदेश प्रमुखको कार्यालय संविधानतः प्रत्यक्ष जनसम्पर्क नरहने कार्यालय अन्तर्गत पर्छ । प्रदेश सरकारबाट निर्माण हुने विभिन्न ऐन कानूनलाई प्रमाणित गरी अन्तिम रुप दिने तथा आवश्यक सुधारको लागि सरकारलाई सिफारिस गर्ने संवैधानिक निकाय हो । प्रदेश सरकारको संरक्षकको भूमिका निर्वाह गर्ने निकाय हो तर त्यहीँ निकाय अभिभावकविहीन हुँदा नासुदेखि तल्लो तहका कर्मचारी रनभुल्लमा परेका छन् ।

कार्यालयका लेखा अधिकृत हरिबहादुर खत्रीले भने, ‘हुन त यो कार्यालय प्रदेश सरकारलाई अभिभावकत्व प्रदान गरेको छ तर यहाँभित्र हामी आफैं अभिभावकविहीन छौं । अभिभावक नहुँदा कुनै पनि घरको हाल के हुन्छ आफैं अनुमान गरौं ।’ 

‘प्रत्यक्ष जनसम्पर्क नरहने कार्यालय कर्मचारीको कम प्राथमिकता पर्ने गर्छन्,’ लेखा अधिकृत खत्रीले भने, ‘उसै पनि यो कार्यालय आमजनतासँग प्रत्यक्ष सम्बन्ध राख्दैन । प्रदेश सरकार जति क्रियाशिल भयो, त्यति नै कार्यालयको क्रियाशिलता बढ्ने हो । काम पनि छैन । कामविहीन पनि छैनौं ।’