जनकपुरधाम – जनकपुरधाम उपमहानगरपालिका–२ स्थित कदम चोकमा रहेको ३ वटा होटेलमा आगलागी हुँदा लाखौं रुपैयाँको क्षति भएको छ ।

रतन ठाकुरको ठाकुर मिष्टान्न भण्डार, सियाराम साहको जय सियाराम मिष्टान्न भण्डार र राम आशिष साहको गोविन्द मिष्टान्न भण्डारमा आगलागीका कारण सम्पूर्ण सम्पत्ति जलेर नष्ट भएको छ । 

बिहीवार बिहान करीब २ बजे भएको आगलागीबाट ३ वटै होटेल जलेर खरानी भएका छन् । आगलागी हुँदा होटेलमा रहेका ९ वटा खाना पकाउने एलपी सिलिन्डर ग्यास पड्किँदा आगो झन्–झन् बढेको थियो । जस्ताको घर भएको होटेलमा आगलागी हुँदा लाखौंको धनमालको क्षति भएपनि मानवीय क्षति भने भएन ।

होटेलमा आगलागी हुँदा सियाराम मिष्टान्न भण्डारका सञ्चालक सियाराम साह र उनका छोरा केशव साह होटेलमा सुतिरहेका थिए । आगो लागेको देखेपछि दुवै जना उठेर होटेलमा रहेको मोटर चलाएर तत्कालै आगो निभाउने प्रयास गरे तर आगो निभ्नुको साटो झन्–झन् बढ्दै गएपछि दुवै जना होटेलबाट बाहिर निस्किए । लगत्तै होटेलमा रहेका ग्यास सिलिन्डर पड्किन थाले । ‘करीब ३ वटा जति सिलिन्डर पड्किएको आवाज हामीले सुन्यौं,’ केशवले भने, ‘मैले आफ्नो जीवनमा यत्रो ठूलो आगलागी कहिल्यै देखेको थिइनँ ।’ पड्किएको सिलिन्डर धेरै माथिसम्म उडेको थियो ।

दमकलको लापरवाही !

आगलागी हुने बित्तिकै केशवले तत्कालै प्रहरीको १०० नम्बरमा खबर गरेका थिए । जनकपुरधाम उपमहानगरपालिका–१६ को कपिलेश्वर प्रहरी चौकीमा प्रहरीको मोटरसाइकल गस्ती पनि कदम चोकमै गस्ती गरिरहेका थिए । लगत्तै जिल्ला प्रहरी कार्यालय धनुषाको मोटरसाइकल गस्ती टोली पनि घटनास्थलमा आइपुगेको थियो तर जनकपुरधाम उपमहानगरपालिकाको कार्यालयमा रहेको दमकलको टोली भने आएन । दमकलको ०४१–५२००११ नम्बरमा फोन गर्दा फोन उठेन । 

फोन नउठेपछि मोटरसाइकलमै रहेको प्रहरी गस्ती टोली मोटरसाइकल लिएरै जनकपुरधाम उपमहानगरपालिकाको कार्यालय पुग्यो तर त्यहाँ दमकलका चालक नै थिएनन् । आधा घण्टापछि दमकलका चालक दमकल लिएर घटनास्थल पुगे तर ट्यांकरमा पानी निकै कम थियो,’ आगलागी पीडित सियाराम साहले भने, ‘त्यसपछि आधा घण्टाको अन्तरालमा जनकपुर उपमहानगरकै अर्को दमकलको गाडी पनि आयो तर त्यसले पनि धेरै काम गरिरहेको थिएन ।’ त्यसपछि धनुषाकै क्षिरेश्वरनाथ नगरपालिका महेन्द्रनगरको दमकल घटनास्थलमा आइपुग्यो । त्यो गाडीको ट्यांकरमा पानी पर्याप्त थियो । त्यो दमकलले राम्रो तरिकाले काम गरेको साहले बताए ।

प्रहरी चौकी कपिलेश्वरका इन्चार्ज प्रहरी नायव निरीक्षक सञ्जिवकुमार यादवका अनुसार आगलागी नियन्त्रणमा लिन ३ वटै दमकललाई करीब १ घण्टा जति समय लागेको थियो । ‘१२ ट्यांकर पानीले मात्र आगो निभेको थियो,’ उनले भने ।

आगलागीका कारण ठाकुर मिष्टान्न भण्डारमा १२ लाख ७५ हजार रुपैयाँको क्षति भएको छ । १ थान फ्रिज, १ थान मोटरसाइकल, ४ बोरा चामल, १ बोरा चिउरा, भाडावर्तन, काठको टेबुल कुर्सी, नागरिकताको प्रमाणपत्र, मोटरसाइकलको कागजात, दराजमा रहेको १४ सय नगद र काउन्टरमा रहेको २५ सय रुपैयाँ नगद समेत जलेर नष्ट भएको छ । त्यसका अतिरिक्त उनले अन्य व्यक्तिलाई तमसुक बनाएर दिएको २० लाख रुपैयाँको तमसुक कागज समेत जलेर नष्ट भएको छ ।

सियाराम मिष्टान्न भण्डारमा पनि अन्दाजी करीब ९ लाख ५० हजार रुपैयाँ बराबरको क्षति भएको प्रहरीले अनुमान गरेको छ । ३ वटा काउन्टर, ३ वटा फ्रिज, टेबुल, कुर्सी, ३ वटा दराज, १ थान टेलिभिजन, एउटा गोदाम, नगद ५० हजार रुपैयाँ क्षति भएको जनाइएको छ ।

गोविन्द मिष्टान्न भण्डारमा पनि ९ लाख ९५ हजार रुपैयाँ बराबरको क्षति भएको प्रहरीले अनुमान गरेको छ । ६ थान फ्रिज, काठको टेबुल कुर्सी ८ थान, मोबाइल १ थान, सिलिन्डर ८ थान लगायतका विभिन्न सामानका साथै नगद ५ हजार रुपैयाँ क्षति भएको छ ।

धनुषाको तारपट्टि सिर्सियाका जुगल किशोर साहको जनकपुरधामको जग्गामा आफ्नै लगानीमा घर बनाएर वर्षौंदेखि होटेल सञ्चालन गर्दै आएका थिए । जग्गावापत जग्गाधनीलाई मासिक १० हजारदेखि १५ हजार रुपैयाँसम्म भाडा दिने गरेको सियाराम साहले बताए ।