सुर्खेत – विगत आठ वर्षदेखि सुर्खेतको चौकुनेमा सिमेन्ट कारखाना खोल्ने भन्दै तयारी गरेका उद्योगपति अजयराज सुमार्गीले २०७७ भदौमा कारखानाको उदघाटन गर्ने गरी अघि बढेको बताएका छन् ।

बिहीवार वीरेन्द्रनगरमा सुर्खेत उद्योग वाणिज्य संघसँगको अन्तरक्रियामा उनले २ अर्ब बराबरको लगानी गरी चौकुनेमा सिमेन्ट कारखाना निर्माण गरिने बताए ।

‘म दुई अर्बको लगानी गरेर अर्को वर्षको भदौमा सिमेन्ट उत्पादन गरिछाड्छु,’ सुमार्गीले भने, ‘यहाँ उत्पादन भएको सिमेन्ट दिल्ली र लखनउमा बेच्छु ।’

उनले अब सिमेन्ट कारखाना स्थापनाका बारेमा कुनै पनि शंका नपाल्न कर्णालीवासीलाई आग्रह समेत गरे ।

‘त्यहाँका जग्गादातालाई कारखानामा ५० हजार बराबरको शेयर दिनेछु । कामदारलाई पनि सोही बराबरको शेयर दिनेछु,’ जनतालाई पनि लगानीकर्ताको रूपमा स्थापित गर्ने आफ्नो योजना रहेको बताउँदै उनले भने, ‘मैले त्यस्तो गरेको खण्डमा बन्द र हडताल हुँदैन र कम्पनीले द्रुत गतिमा काम गर्छ ।’

उनले कारखानामा ७ सय जनाले काम पाउने र प्रतिदिन ६ सय मेट्रिक टन सिमेन्ट उत्पादन हुने जानकारी दिए ।

‘अहिले हामीलाई बाटोको समस्या छैन । तिखाकुनाबाट भएर हामी सामान ढुवानी गर्नेछौं,’ उनले भने, ‘तर बिजुलीको समस्या भने छ । यसका लागि हामीले प्रदेश सरकारसँग कुरा गरिरहेका छौं ।’

उनले बिजुली नपुगेसम्म जेनेरेटर चलाएर भएपनि उत्पादन शुरू गरिने प्रतिबद्धता जनाए ।

उनले सुर्खेतका व्यवसायीलाई पाँच लाख घार माहुरी पाल्ने योजनाका साथ अघि बढन आग्रह गरे । ‘पाँच लाख घार माहुरी पाल्ने गरी योजना बनाउनुस् । एक लाख परिवारलाई बाख्रा पाल्न लगाउनुहोस्,’ उनले भने, ‘पैसा नभएकालाई बैंकभन्दा आधा कम व्याजदरमा पैसा दिन्छु, इन्श्योरेन्स गरिदिन्छु । र किनिपनि दिन्छु ।’

उनले कर्णालीमा मासु र मह राख्न कोल्ड स्टोर खोलिदिने बताए ।

कर्णालीमा जडिबुटीको अथाह सम्भावना भएको बताउँदै उनले दुई अर्ब रुपैंया यो क्षेत्रमा लगानी गर्न तयार रहेको बताए ।

‘जडिबुटीको बिउ दिन्छु, मल दिन्छु र प्रशोधन पनि गर्छु अनि जनताबाट खरिद गर्दै बिक्री पनि गर्छु,’ उनले भने, ‘यसका लागि पनि व्यवसायी साथीहरू तयार हुनुस्, दुई अर्ब लगानी गर्न म तयार छु ।’

साथै उनले नेपालमा बैंकहरू मौलाउने र व्यापारीहरू मर्कामा पर्ने गरेको बताए ।

‘कुनै व्यवसाय गर्ने व्यक्ति यहाँ डुबेको छ,’ उनले भने, ‘कुनै बैंक डुबेको देख्नु भएको छ ? मेरै अर्बौ पैंसाको ब्याज बैंकहरूले खाइरहेका छन् । सरकारले न मेरो पैसा फिर्ता लिएको छ न बैंकले मलाई दिएको छ ।’