‘क्लिनफिड’को विरोधस्वरुप विदेशी च्यानल बन्द!

असार ९, २०७६

काठमाडौं– डिजिटल टिभी सेवा प्रदायकहरुले नेपालमा सञ्चालन गर्दै आएका विदेशी टिभी च्यानल बन्द गरेका छन् । डिजिटल टिभी सेवा प्रदायकहरुको साझा संयन्त्र ‘इन्टरनेट तथा डिजिटल टिभी सेवा प्रदायक समन्वय समिति’ले सोमवार दिउसोदेखि टिभी च्यान बन्द गरेका हुन् ।

सरकारले नेपालमा सञ्चालनमा रहेका विदेशी च्यानलहरु ‘क्लिन फिड’ (विज्ञापन रहित) हुुनुपर्ने नीति ल्याएको छ । सरकारले ल्याउन लागेको ‘क्लिन फिड’ सम्बन्धि विधेयक संसदको राष्ट्रिय सभाबाट पारित भई संसदमा छलफलको क्रममा रहेको छ ।


ADVERTISEMENT

सो विधेयकमा नेपालमा सञ्चालनमा रहेका विदेशी च्यानलहरु विज्ञापन रहित हुनपर्ने प्रावधान राखेकोले क्लिन फिड लागु भएमा कस्तो अवस्था आउँछ भन्ने जानकारी दिन दवावस्वरुप सोमवार दिउँसो तीन बजे देखि मंगलवार दिउँसो तीन बजेसम्मका लागि विभिन्न च्यानलहरु बन्द गरेको हो । 

नेपालमा प्रसारित च्यानलहरु मध्ये ८५ प्रतिशत च्यानलहरु विदेशी भएको र विदेशी च्यानलहरुका साझा संस्था इन्डियन ब्रोडकाष्टर फोरमले नेपाललाई मात्रै क्लिन फिड दिन व्यवहारिक र व्यवसायिक रुपमा असमर्थ रहेको यसअघि नै जानकारी गराइसकेको संघर्ष समितिको भनाई  छ ।
क्लिन फिड लागु भएमा डिजिटलाइजेसनको क्रममा रहेको डिजिटल टिभी व्यवसायको अर्बौं रुपैंयाको लगानी डुब्ने र संविधानले दिएको सूचना तथा मनोरञ्जनको हकबाट नेपाली जनता वञ्चित हुने चिन्ता इन्टरनेट सेवा प्रदायकहरुको रहेको छ ।

समितिले सोमवार पत्रकार सम्मेलन गर्दै सोको जानकारी गराएको हो । समितिमा साझा इन्टरनेट सेवा प्रदायक एसोसिएसन अफ नेपाल (स्पान) तथा नेपाल केवल टिभी महासंघ र अन्य डिजिटल टिभी सेवा प्रदायकहरु डिसहोम, नेट टिभी तथा प्रभु टिभी लगायतका सेवा प्रयदाक रहेका छन् ।
 

असार ९, २०७६ मा प्रकाशित

प्रतिक्रिया दिनुहोस

ताजा समाचार