काठमाडौं – इस्तानबुलमा मारिएका साउदी पत्रकार जमाल खशोग्गीकी प्रेमिका ह्याट्टिस चेंगिजले उनको शरीर नभेटिएकाले उनी जिउँदै छन् कि भन्ने लाग्ने गरेको बताएकी छन् । 

इस्तानबुलस्थित साउदी वाणिज्य दूतावासबाहिर खशोग्गीलाई कुरिबस्दा उनलाई पक्राउ गरिएको शंका लागे पनि उनको वीभत्स हत्या होला भन्ने चाहिँ नलागेको चेंगिजले बताइन् । 

खशोग्गीको हत्याका विषयमा अमेरिकाका राष्ट्रपति डोनल्ड ट्रम्पले मन नलाइकन प्रतिक्रिया दिएकोमा चेंगिजले कठोर आलोचना गरिन् । हत्यामा साउदी युवराज मोहम्मद बिन सलमानको हात रहेको विषयमा पूर्ण अनुसन्धान गर्न अमेरिकाले सघाउनुपर्ने उनले माग राखेकी छन् । 

गत साता संयुक्त राष्ट्रसंघले खशोग्गीको हत्या साउदीको हत्यारो टोलीले गरेको र त्यो टोलीलाई सरकारको समर्थन रहेको प्रतिव्दन सार्वजनिक गरेको थियो । 

युवराज नै हत्यामा मतियार रहेको विश्वसनीय प्रमाण रहेको प्रतिवेदनमा उल्लिखित छ । तर युवराजले संलग्नता अस्वीकार गरेका छन् । 

जेनेभामा बुधवार बोल्दै टर्कीश विदूषी चेंगिजले वाणिज्य दूतावासबाट खशोग्गी निस्कने व्यग्र प्रतीक्षा आफूले गरेको बताइन् । 

‘शुरूमा त मलाई उनीमाथि केही खराब भयो कि भन्ने लागेको थियो तर मैले यस्तो स्थिति बन्यो होला भन्ने लागेको थिएन । उनलाई पक्राउ गरियो होला अनि शायद सोधपुछ गरे होलान् भन्ने लागेको थियो । हत्या गरियो होला भन्ने त मैले सोचेकी पनि थिइनँ ।’

साउदी हत्याराहरूले खशोग्गीको शरीर टुक्राटुक्रा गरी फालेको खबर आएपनि शरीरको कुनै अवशेष फेला नपारेकाले उनी जिउँदै छन् कि भन्ने आशामा महिनौं बसेको उनले बताइन् ।

एजेन्सी