काठमाडौं- लक्ष्मी बैंकले ७ प्रदेशका लागि उपयुक्त VISA कार्ड डिजाइनको खोजी गर्न crowd sourcing को प्रक्रियाद्वारा देशभर खुल्ला प्रतियोगिताको घोषणा गरेको छ ।

यो प्रतियोगिताको मुल उद्देश्य भनेकै सातै प्रदेशका मौलिक कला, संस्कृति र विशेषता झल्किने र त्यसको परिचय दिने डिजाइनको खोजी भएकाले प्रतियोगिताले ग्राहकहरूलाई उत्कृष्ट ब्राण्ड एक्स्पेरियन्स् समेत प्रदान गराउने लक्ष्य बैंकको छ ।

डिजाइन मौलिक, अद्वितीय एवं कपीराइट उल्लङ्घन नभएको हुनुपर्ने बैंकले जनाएको छ । प्रस्तुत प्रतियोगितामा नेपाली नागरिक वा कानूनी रूपमा नेपालमा दर्ता भएको कम्पनीले सहभागिता जनाउन सक्नेछन् । कार्ड डिजाइन गर्दा प्रदेशको मौलिककला, संस्कृति वा प्राकृतिक सुन्दरता झल्किएको हुनुपर्ने छ । कन्सेप्ट फोटो, पेन्टिङ्ग वा ग्राफिक इलसट्रेशन मार्फत पेश गर्न सकिनेछ ।

प्रत्येक विजयी कन्सेप्टले नगद पुरस्कार स्वरूप ५० हजार रुपैयाँ प्राप्त गर्न सक्नेछन् । यसरी ७ प्रदेशको लागि कुल नगद पुरस्कार ३ लाख ५० हजार रुपैयाँ प्रदान गरिने छ । 

विजेताको घोषणा गर्ने अन्तिम निर्णय लक्ष्मी बैंकमा निहीत छ भने छनोट भएमा उक्त डिजाइनको सर्वाधिकार बैंकमा निहीत हुने छ । प्राप्त डिजाइनहरू बैंकले आफ्नो अवश्यकता बमोजिम कुनै पनि बेला प्रयोग गर्न समेत सक्नेछ । प्रतियोगीहरूले आफ्नो डिजाइन जुलाई महिनाको ३१ तारिखसम्ममा बैंकको वेबसाइट मार्फत बुझाइसक्नु पर्नेछ ।