धनगढी- कैलालीको अत्तरिया नगरपालिकाको नगरसभामा अवरोध गरेको आरोपमा अत्तरिया उद्योग वाणिज्य संघका अध्यक्ष अशोक देवकोटासहित ३ जनालाई प्रहरीले बुधवार पक्राउ गरेको छ ।

आफ्नो धारणा राख्न आयोजना गरिएको पत्रकार सम्मेलनमा सहभागी भएका अध्यक्ष देवकोटा, संघका सदस्य विपिन कुमार साउद र दिनेश विष्टलाई प्रहरीले पक्राउ गरेको हो । ईलाका प्रहरी कार्यालय मालाखेतीका डीएसपी ज्ञानबहादुर विष्टको नेतृत्वमा गएको प्रहरीको टोलीले नियन्त्रणमा लिएको छ ।

गोदावरी नगरपालिकाले यही असार १० आयोजना गरेको तेस्रो नगर सभाको उद्घाटन कार्यक्रममा माइक तोडफोड गरेको, माइकको तार काटेको र कार्यक्रम बिथोल्ने प्रयास गरेको भन्दै नगरपालिकाले देवकोटासहितका ८ जनाविरुद्ध किटानी दिएकाले पक्राउ गरिएको जिल्ला प्रहरी कार्यालय कैलालीका प्रहरी प्रमुख प्रहरी उपरिक्षक सुदिप गिरीले जानकारी दिए ।

नगरपालिकाले केही दिन पहिले अध्यक्ष देवकोटासहित ८ जना विरुद्ध सार्वजनिक हित विपरीतको क्रियाकलाप गरेको भन्दै जिल्ला प्रहरी कार्यालयमा मुद्दा दायर गरेको थियो । पक्राउ परेका तीनै जना जिल्ला प्रहरी कार्यालय कैलालीको हिरासतमा रहेको र कानूनी कारवाही अगाडि बढिरहेको प्रहरी प्रमुख प्रहरी उपरिक्षक गिरीले बताए । 

नगरसभाको उद्घाटन सत्रको कार्यक्रममा आफूहरूले पनि स्थानीय व्यापारीका समस्याहरू राख्न पाउनुपर्ने भन्दै अत्तरिया उधोग वाणिज्य संघका अध्यक्ष देवकोटा नेतृत्वको समूहले अवरोधको प्रयास गरेको थियो । कार्यक्रममा प्रमुख अतिथि रहेका पूर्वमन्त्री लेखराज भट्ट र विशिष्ट अतिति रहेका सुदूरपश्चिम प्रदेशका सामाजिक विकास मन्त्री कृष्णराज सुवेदीले बोल्ने बेला पटक–पटक माइकको तारमा अवरोधको प्रयास गरिएको थियो ।

नगरपालिकाले अध्यक्ष देवकोटासहित सचिव शंकर खड्का, सदस्य दिपिन कुमार साउद, सदस्य रविन्द्र खनाल, स्थानीय व्यापारी राजेन्द्र बोगटी, केशव नौन्याल, दिनेश विष्ट र मोहन पाठकको नाममा जिल्ला प्रहरी कार्यालयमा सार्वजनिक हितविरुद्धको मुद्दा दर्ता गरेको छ । मुद्दा दर्ता भएपछि प्रहरीले देवकोटालगायत सबैको खोजी गरिरहेको थियो । अन्यको पनि खोजी कार्य जारी रहेको प्रहरीले जनाएको छ ।

यसैबीच पक्राउको विरोधमा व्यापारीहरूले अत्तरिया बजार बन्द गराएका छन् । प्रहरीले पक्राउ गरेपछि अत्तरिया उद्योग वाणिज्यको आह्वानमा बजार बन्द गरिएको छ । व्यवसायीहरूको साझा समस्यालाई नगरपालिकाको नगरसभामा राख्न नपाएको विषयमा विरोध गर्दा मुद्दा लगाएर पक्राउ गर्नु गलत भएको भन्दै अत्तरियाका व्यवसायीहरूले स्वच्छिक रूपमा बजार बन्द गराएको अत्तरिया उद्योग वाणिज्य संघका महासचिव यज्ञराज जोशीले जानकारी दिए ।