‘आन्दोलन गर्दासम्म लोकप्रिय, तर शासन चलाउन नजान्ने तीतो अनुभव हामीमा देखियो’

असार २२, २०७६

काठमाडौं – नेपाल कम्युनिस्ट पार्टी (नेकपा)का अध्यक्ष पुष्पकमल दाहाल प्रचण्डले आन्दोलन गर्दासम्म लोकप्रिय रहे पनि सत्तामा पुगेपछि शासन चलाउन नजान्ने रोग नेपालका कम्युनिस्ट पार्टीमा देखिएको बताएका छन् ।

जनतासँग गरिएका वाचा पूरा गर्न सबैखाले अहंकार र व्यक्तिवादी चरित्रभन्दा माथि उठनुपर्ने उनको भनाइ छ । 


ADVERTISEMENT

नेपाल दूरसञ्चार राष्ट्रिय कर्मचारी संगठनको एकता महाधिवेशनलाई आइतवार भक्तपुरमा उद्घाटन गर्दै अध्यक्ष प्रचण्डले सरकारको नेतृत्वमा पुगेको कम्युनिस्ट पार्टीको लोकप्रियताको ग्राफ घट्दै गएको भन्दै चिन्ता व्यक्त गरेका हुन् ।

‘अहिले हामी फेरि एउटा अग्नि परीक्षामा छौं, जनताको भरोसाविना टोलटोलमा गएर राजनीतिक रूपमा प्रशिक्षित गर्ने, अगुवाई गर्ने र जनताको भरोसा लिन सिपालु कम्युनिस्टहरू शासनमा पुगेपछि साशन चलाउन चाहिँ नजान्ने, विश्वभरी त्यो एउटा तितो नेगेटिभ अनुभव देखिएकै छ, त्यो अक्टोवर समाजवादी क्रान्तिदेखि अहिलेसम्म पनि देखिएको छ,’ प्रचण्डले भने, ‘आन्दोलन गर्ने हदसम्म उनीहरू लोकप्रिय । शासन गर्ने ठाउँमा पुग्दासम्म उनीहरूको त्यो लोकप्रियताको ग्राफ माथि जाला भन्दा तलतिर ओर्लिने खतरा जो छ, हामीले त्यसको सामना गर्नुछ ।’

यो अग्नि परिक्षा पास गरेमा सगरमाथाको देश नेपालबाट संसारलाई नयाँ उज्यालो र शक्तिशाली सन्देश दिन सकिने उनले बताए ।

‘हामीले पनि अरू देशका शासक कम्युनिस्ट जस्तै, शासनमा पुगेका कम्युनिस्टले जस्तै लोकप्रियताको ग्राफ घटाउँदै लग्यौं, सामूहिक स्वार्थलाई भन्दा व्यक्तिगत र गुट स्वार्थलाई साथ दिन थाल्यौँ भने फेरि हाम्रो पनि नियती, नियत बढो सफा हुँदाहुँदै पनि नियतिले बजार्दिने त्यही ठाउँमा हो,’ प्रचण्डले थपे । 

प्रचण्डले नेकपाभित्र बेलाबेलामा देखिएका कन्फ्युजन हटाउनका लागि पहलकदमी लिन पछि नपर्ने उल्लेख गरे । 
 

असार २२, २०७६ मा प्रकाशित

प्रतिक्रिया दिनुहोस