बुटवल– ‘मोस्ट वान्टेड’ नसिम अहमद मुसलमान (नसिम खान) उर्फ ‘बादशाह’लाई काठमाडौंमा पक्राउ गरी कपिलवस्तु ल्याइएको छ ।

कपिलवस्तुमा लामो समयदेखि अपराध गर्दै आएका मायादेवी– ४ का खानलाई राष्ट्रिय अनुसन्धान ब्यूरोले काठमाडौंबाट पक्राउ गरेको थियो ।

बादशाहलाई कपिलवस्तु प्रहरीले आइतबार सार्वजनिक गरेको छ । उनलाई गएराति नै कपिलवस्तु ल्याइएको प्रहरी उपरीक्षक दीप शमशेर राणाले बताए ।

खानको पक्राउलाई प्रहरीले ठूलो सफलताको रूपमा दाबी गरेको छ ।

बादशाह ८ जनाको हत्या र अरू धेरै अपराधिक घटनामा संलग्न भएको आरोपमा कुख्यात अपराधीको रूपमा प्रहरीको खोजी सूचीमा रहेका थिए ।

पक्राउ परेका बादशाहमाथि २०६३ जेठ १९ गते कपिलवस्तु फुलिका ३ का धर्मराज बराईको छोराको धारिलो हतियार प्रहार गरी हत्या गरेको, २०६४ फागुन ६ गते मोतिपुर १ का भुवन भन्ने प्रेम परियारको गोली हानी हत्या गरेको, २०६४ चैत ९ गते हथिहवा ३ का शिवपुजन कुर्मीको गोली हानी हत्या गरेको, २०६५ भदौ २० गते कपिलबस्तु नगरपालिका १० का पारसनाथ कोहारको श्रीमती अकला कोहारको हत्या गरेको, २०६५ कार्तिक ९ गते तत्कालीन पिपरा गाविस सचिव राममिलन प्रसाद गुप्ताको गोली हानी हत्या गरेको, २०६७ वैशाख १३ गते पकडी ६ का राजेन्द्रप्रसाद तिवारीको हत्या गरेको मुद्दा अदालतमा दर्तामा रहेको छ ।

यसैगरी पछिल्लो पटक २०७४ साल वैशाख १३ गते मायादेवी गाउँपालिका वडा नं. ४ का वडा अध्यक्ष फतेह मोहम्मदको छोरा ४ वर्षिय मोहम्मद अयमान मुसलमानको अपहरणपछि हत्या गरेको र २०६४ वैशाख १७ गते कपिलवस्तु नगरपालिका– १ का सन्दीपकुमार गुप्ता गुप्ता चढेको जिप रोकी हतियार (बन्दुक) देखाई २ लाख डाँका चोरी गरेको मुद्दाहरू रहेका छन् ।

पक्राउ गरिएका मोस्ट वान्टेड बादशाहलाई प्रहरीले जिल्ला अदालतमा पेश गर्ने जिल्ला प्रहरी कार्यालय कपिलवस्तुका प्रवक्ता प्रहरी नायब उपरीक्षक देवेन्द्र पाण्डेले बताए ।

पछिल्लो समय प्रहरीले विभिन्न हत्या अपराधमा संलग्न रहेका फरार अपराधीहरूलार्ई धमाधम पक्राउ गरेको प्रहरी उपरीक्षक राणाले  बताए ।

नेकपा सदस्य समेत रहेका बादशाहलाई नेकपाकै दबाबमा स्थानीय प्रशासनले हालसम्म संरक्षण गर्दै आएको थियो ।