तनाव र कुलत हटाउने उपाय

असार २४, २०७६

तपाईं आफ्नो कार्यालयमा तनावमा हुनुभयो भने राति धेर खाने वा जंक फूड खाने गर्न थाल्नुहुन्छ । यसले तपाईंको स्वास्थ्यलाई नराम्रो असर पार्छ ।

एक नयाँ अनुसन्धानका अनुसार राति राम्रो सुत्दा कार्यालयमा तनावबाट बच्न तथा बेलुका अस्वस्थ खाना खानका लागि प्रेरित नहुन मद्दत पुग्छ ।


ADVERTISEMENT

अमेरिकाको मिसिगन विश्वविद्यालयमा मनोविज्ञानका एसोसिएट प्रोफेसर तथा अनुसन्धानकी सहलेखिका चू सीयाङ चाङले भनिन्, ‘जुन कर्मचारीलाई कार्यालयमा दिनभरि तनावको सामना गर्नुपर्ने स्थिति आउँछ, उनीहरू नकारात्मक भावनाहरूलाई भान्सामा लिएर आउँछन् । अनि उनीहरू सामान्यभन्दा बढी भोजन गर्छन् र जंक फूड खाइदिन्छन् ।’

अनुसन्धानको निष्कर्ष जर्नल अफ एप्लाइड साइकोलोजीमा प्रकाशित भएको छ । अनुसन्धानका क्रममा २३५ जना कर्मचारीमाथि दुई फरक फरक अध्ययन गरिएको थियो ।

सूचना प्रविधिको क्षेत्रमा काम गर्ने कर्मचारीले दिनदिनै दिमाग खियाउने भारी काम गर्नुपर्ने हुनाले तनाव खेप्नुपर्छ ।

अर्को अध्ययन चाहिँ कल सेन्टरमा काम गर्ने कर्मचारीमाथि गरिएको थियो । उनीहरूले अनेकथरी ग्राहकसँग कुराकानी गर्दा तनाव खेप्नुपर्छ ।

अमेरिकाको इलिनोइ विश्वविद्यालयमा असिस्टेन्ट प्रोफेसर तथा अनुसन्धान प्रतिवेदनका सहलेखक इहाओ लिउले भने, ‘दुवै अध्ययनमा कार्यालयमा तनावपूर्ण काम गर्ने क्रममा कर्मचारीहरूले देखाउने नकारात्मक व्यवहार नै उनीहरूको बेलुकीको अस्वस्थकर भोजनमा रुचिसँग जोडिएको छ ।’

लिउले थपे, ‘समय समयमा भोजन गर्नु कुनै व्यक्तिको नकारात्मक व्यवहारलाई शान्त र नियन्त्रित गर्नका लागि उपयोगी हुन्छ किनकि खासमा व्यक्ति अनुकूल भावनालाई स्वीकार गर्न मन पराउँछन् ।’

एजेन्सी

असार २४, २०७६ मा प्रकाशित

प्रतिक्रिया दिनुहोस