स्याङ्जा – गल्याङ नगरपालिका–१० भिरालेका किसानले घरबारीको पाखो बारीमा रहेको झाडी फाँडेर सामूहिक टिमुरखेतीको शुरूवात गरेका छन् ।

बाँदर, मृग लगायतका जंगली जनावरले लगाएको खेतीबाली आएर हैरान बनेका किसानले बारीमा खेती नै लगाउन छाडेका थिए ।

खेती नलगाएसँगै झाडी बनेको बारी भने यतिबेला किसानले फाँडेर चिटिक्क पारेका छन् । वडा कार्यालयले किसानलाई टिमुरखेतीका बारेमा जानकारी दिनुका साथै आवश्यक बिरुवासमेत उपलब्ध गराएपछि किसान यस खेतीतर्फ आकर्षित भएका हुन् । 

भिरालेका ५० घर स्थानीयले देवीभञ्ज्याङ टिमुर व्यावसायिक कृषि समूह गठन गरी साढे १ हेक्टर बाँझो जग्गालाई सदुपयोग गर्दै टिमुरखेती शुरू गरेका हुन् । करीब १ हजार २ सय टिमुरको बिरुवा लगाएको टेकबहादुर सिंजालीले बताए । बाँदर, मृग, दुम्सी लगायतका जनावरले अन्नबाली रहन नदिएपछि टिमुरखेती शुरू गरेको सिंजालीले बताए ।

सामूहिक टिमुरखेतीमा लाग्नुभएकी लीला सारुले बाँझो जग्गाको सदुपयोग पनि हुने र आर्थिक उपार्जनसमेत गर्न सकिने भएकाले सामूहिक टिमुरखेतीमा लागेको बताए । टिमुरखेतीको सम्भावना देखेर आफूहरू यस खेतीमा लागेको उनले बताए ।

अघिल्लो वर्ष वडामा ७०० टिमुरका बिरुवा परीक्षणका रूपमा लगाइएको र टिमुरका लागि चाहिने खालको उपयुक्त हावापानी भएकाले यस वर्षदेखि व्यावसायिकरूपमा समूह बनाएर शुरू गरेको कृषक लक्ष्मण शाहीले बताए । टिमुरखेतीका लागि गाउँमै नर्सरी बनाएर बिरुवासमेत उत्पादन गरिएको शाहीले बताए ।

वडाध्यक्ष धु्रवप्रसाद शर्मा पंगेनीले वडालाई जैविक वडाका रूपमा विकास गर्न कृषिका माध्यमबाट अगाडि बढिएको बताए । युवालाई विदेश पलायन हुनबाट रोक्न सामूहिक टिमुरखेती, सामूहिक कागतीखेती, कुरिलोखेतीलाई समेत वडाले प्राथमिकता दिएको उनको भनाइ थियो ।