काठमाडौं – अमेरिकाको टेक्सासमा महिनौंदेखि हराइरहेका एक व्यक्तिलाई हाडखोर समेत बाँकी नराखी उनकै १८ वटा कुकुरले खाइदिएको प्रहरीले जनाएको छ । 

५७ वर्षीय फ्रेड्डी म्याकका कुकुरहरूको दिसामा प्राप्त हाडका टुक्राको डीएनए परीक्षण गर्दा त्यो म्याककै हाड भएको पत्ता लाग्यो ।

डेपुटी शेरिफ आरोन पिट्सले मिश्रित प्रजातिका १८ वटा कुकुरले म्याकको शरीर, कपडा र कपाल समेत खाइदिएको र दुईदेखि पाँच इन्चको हाडको टुक्रा मात्र छोडेको बताए । 

‘एउटा पूरै मान्छे नै खाइदिएको हामीले न देखेका थियौं, न सुनेका थियौं,’ पिट्सले बताए, ‘हाड पनि टुक्रा टुक्रा पारेर खाइएको रहेछ ।’

म्याकलाई गम्भीर रोग लागेको थियो र कुकुरहरूले आफ्नो मालिकलाई मारेर खाए कि उनी रोगले मरेपछि उनको शरीर खाए भन्ने प्रस्ट हुन सकेको छैन । ‘जे भए पनि यो अत्यन्तै हृदयविदारक घटना हो र म्याकको परिवारप्रति हामी सहानुभूति प्रकट गर्छौं,’ शेरिफ याडम किङले एक वक्तव्य जारी गरेर बताए । 

गत मे महिनामा एकलकाँटे म्याक घरैबाट हराएपछि एकजना नातेदारले प्रहरीलाई खबर गरेका थिए । प्रहरीले धेरै दिनसम्म पनि म्याकको पत्तो पाउन सकेन । 

त्यसपछि उसले म्याकको घरैमा व्यापक खोजी गर्ने निर्णय गर्‍यो । अग्लो घाँसमा प्रहरीले मानव कपाल, कपडा र हाडसहितको कुकुरको दिसा देख्यो । ती कुरालाई प्रहरीले परीक्षण गर्न प्रयोगशाला पठायो । म्याकका नातेदारसँग डीएनए म्याच गरेर उनलाई नै कुकुरले खाएको पत्ता लाग्यो । 

पिट्सका अनुसार, दुईवटा कुकुरलाई अन्य कुकुरले नै मारिदिए, १३ वटा धेर आक्रामक भएकाले प्रहरी मारिदियो अनि बाँकी तीन कुकुर चाहिँ पाल्नका लागि राखिएको छ । 

म्याकले आफ्ना कुकुरहरूलाई माया गर्ने गरेको प्रहरीको भनाइ छ ।

एजेन्सी