बुटवल – शनिवार दिउँसो तीन बजेदेखि बन्द सिद्धार्थ राजमार्ग अन्तगर्त बुटवल–पाल्पा सडक एकतर्फी रूपमा सञ्चालनमा आएको छ ।

शनिवार दिउँसो सिद्धबाबा मन्दिर (हेडबक्स) नजिकै ठूलो पहिरो खसेको थियो । सोही पहिरोमा परी पाल्पा मित्याल गाउँपालिकाका ३२ वर्षीय धनबहादुर सुनारीको मृत्यु भएको छ ।

सुनारी चढेको लु५०प ४६७१ नम्बरको मोटरसाइकल पहिरोले उछिट्ट्याएर तिनाउ नदीको किनारामा पुर्‍याएको थियो ।

इलाका प्रहरी कार्यालय बुटवलका प्रमुख डीएसपी भीमलाल भट्टराईले सडक बिहान साढे १० बजेबाट एकतर्फी रूपमा सञ्चालनमा आएको जानकारी दिए ।

शनिवारदेखि अलपत्र गाडी र यात्रुहरूलाई गन्तव्यतर्फ पठाइएको छ । उक्त ठाउँमा अझै पहिरो झर्ने जोखिम रहेकाले सचेत भएर गाडी चलाउन चालकहरूलाई भट्टराईले आग्रह गरे ।