काठमाडौं – भारतमा एयरलाइन्स कम्पनीहरू संकटमा परेपछि खर्च कटाउने मिसनमा लागेका छन् । 

विमान उडाउन हुने खर्चमा ४० प्रतिशत त इन्धनमा मात्र हुन्छ । त्यसैले धेरैजसो विमान कम्पनीहरू इन्धनको खपत कम गर्न प्रयास गरिरहेका छन् ।

ट्याक्सीबोट नामक एउटा अर्धरोबोटिक यन्त्र छ । यो रोबोट ९.५ मिटर लामो र ४.५ मिटर चौडा छ । 

ट्याक्सीबोटले विमानको २१३ लिटर इन्धन बचाउने गरेको केएसयू एभिएसनका कम्युनिकेसन हेड सञ्जय बहादुरले बताए । यसमा ४०० हर्सपावरका दुई इन्जिन हुन्छन् । इन्जिनबाट इलेक्ट्रिक जेनेरेटर चल्छन् र यिनैले सबै उपकरणलाई बिजुली आपूर्ति गर्छन् । इन्जिन बन्द भयो भने भने पनि पाइलटले दिएको कमान्डअनुसार विमान धावनमार्गसम्म पुग्छ । 

खर्च बचाउनका लागि साना विमानले कम तौलका विमान परिचारिका राख्ने गरेको छ । विमानमा जति कम तौल भयो, अवतरण र उडानमा त्यति नै कम इन्धन खपत हुन्छ । अनि अग्ला भन्दा पनि होचा एयरहोस्टेसलाई प्राथमिकता दिइएको छ । 

यसबाहेक विमानहरूले अब चाहिने जति मात्र तेल हाल्ने भएका छन् । आपतविपतमा परिएला भनी अहिलेसम्म विमानले आवश्यकताभन्दा २० प्रतिशत बढीसम्म तेल हाल्ने गरेका थिए । 

अनि कुनै ठाउँबाट अर्को ठाउँमा जाने विमानले गन्तव्यका लागि उड्नुअघि नै मौसमको जानकारी लिनेछ । नत्र कहिलेकाहीँ मौसम बिग्रँदा वा जाम हुँदा गन्तव्यको विमानस्थलमा अवतरण गर्नुअघि विमान आकाशमा घुमेको घुम्यै गर्नुपर्थ्यो । त्यसले गर्दा बढी इन्धन नाश हुन्थ्यो ।

अनि इन्धन बचाउन विमानको कार्पेट पनि हलुका राख्ने गरिएको छ । ककपिटमा कागजबाट हुने काम अब आईप्याडले गर्न थालेको छ ।

एजेन्सी