काठमाडौं- प्रधानमन्त्री केपी शर्मा ओलीले नेपालमा जलवायु परिवर्तनको नकारात्मक असर परेको बताएका छन् । ग्रीनहाउस ग्यास उत्सर्जनमा नेपालको भूमिका नगण्य भए पनि नेपालले यसको असर खेपिरहनु परेको प्रधानमन्त्री ओलीको भनाइ छ ।  

वन तथा वातावरण मन्त्रालयको आयोजनामा राजधानीमा आयोजित जलवायुसम्बन्धी अन्तर्राष्ट्रिय गोष्ठीको सोमवार उद्घाटन गर्दै प्रधानमन्त्रीले सो कुरा बताएका हुन् । 

'नेपालको भू-बनावटका कारण संसारभरका मानिस रूचीपूर्वक प्राकृतिक सुन्दरताको अवलोकन गर्न मात्र होइन अनुसन्धान गर्न पनि यहाँ आउने गरेका छन्,' प्रधानमन्त्री ओलीले भने । 

प्रधानमन्त्री ओलीले विश्वस्तरमा बढ्दो तापक्रम, ग्लेसियरको तह पातलो हुँदै गएको अवस्था र अस्वभाविक वर्षाका कारण जनजीवनमा गम्भीर र नकारात्मक असर परिरहेको बताए । 'जलवायु परिवर्तनकै कारण बालीनाली प्रभावित भएका छन्, आवास तथा संरचनाको क्षति भइरहेको छ,' प्रधानमन्त्री ओलीले भने, 'यी सबै कारणहरूले अर्थतन्त्रमा ठूलो घाटा भइरहेको छ ।' 

'हाम्रा सामु जलवायु परिवर्तका असर र चुनौतिहरूको सामना गर्न जनतालाई बढी सशक्त बनाउने र त्यस्ता असरहरूलाई सम्बोधन गर्न तयार रहने बाहेकका उपाय छैनन्,' प्रधानमन्त्री ओलीले भने, 'हाम्रो संविधानको धारा ३० ले स्वच्छ वातावरणमा बाँच्न पाउने नागरिकको आधारभूत अधिकारलाई सुनिश्चित गरेको छ । यो धाराको पूर्ण कार्यन्वयन गर्न सरकार प्रतिबद्ध छ ।' 

सरकारले हरेक वर्ष प्राकृतिक प्रकोपलाई व्यवस्थापन गर्न ठूलो परिमाणमा स्रोतको व्यवस्था गर्ने गरेको प्रधानमन्त्री ओलीको भनाइ छ ।   

प्रधानमन्त्री ओलीले आगामी मार्च महिनामा नेपाल सरकारको आयोजनामा सगरमाथा संवाद आयोजना गर्न लागिएको बताए । 'त्यो अन्तर्राष्ट्रिय मञ्चमा मानव जातिका समकालीन विषयवस्तुउपर गम्भीर विमर्शका लागि विश्वका नेता, वैचारिक नेता र सरोकारवालाहरूको जमघट हुनेछ,' उनले भने, 'आउँदो पहिलो सम्वादको विषय जलवायु परिवर्तन नै हुनेछ ।'