लण्डन– गैर आवासीय नेपाली संघ (एनआरएन) यूकेको अध्यक्ष पदमा सुशीला राईले उम्मेदवारी घोषणा गरेकी छन् ।

आइतवार अल्डरसटमा आयोजित चुनावी घोषणा सभामार्फत उनले उम्मेदवारीको औपचारिक घोषणा गरेकी हुन् । उनले ७ बुँदे प्रतिबद्धता समेत सार्वजनिक गरेकी छन् ।

एनआरएन यूकेलाई एकताबद्ध, सशक्त र मजबुद् बनाउन र यूकेमा रहेका प्रवासी नेपालीको सुखदुःखमा दरिलो साथी बनाउनका लागि आफू संस्थाको नेतृत्वमा आउन चाहेको उनको भनाइ छ ।

‘लामो समयदेखिको सामाजिक कार्यको रुचि र अनुभव, एनआरएन यूकेमा दुई कार्यकालको अनुभव र बेलायतको १२ वर्षको बसाईले मैले यहाँका प्रवासी नेपालीका पीडा, समस्या, दुःखलाई राम्रोसंग बुझेको छु र एनआरएन यूकेजस्तो संस्थाले के गर्नुपर्छ भन्ने चाल पनि पाएको छु,’ उनले भनिन् ।

आफ्ना प्रतिबद्धतालाई बोलीमा मात्र सीमित नगरी व्यवहारमै देखाउने अठोट राईले व्यक्त गरेकी छन् । 

‘मेरो स्वभाव बोलेर भन्दा गरेर देखाउने छ । चुनौतिसित हटेर होइन, डटेर लड्ने मेरो आदत छ । मेरो विगत दुई कार्यकालमा मेरो काम हेर्नुभयो भने त्यो अझ छर्लंग हुन्छ,’ उनले भनिन् ।