काठमाडौं– काठमाडौं महानगरपालिकाले महानगरभित्र फोहर संकलन गर्ने निजी संस्थाहरूलाई दर्ता गर्ने भएको छ ।

अहिलेसम्म निजी संस्थाले आफूखुशी फोहर संकलन गर्दा एकातिर समन्वय नभएको र अर्कातिर राजश्व नआएको भन्दै महानगरले निजी संस्था दर्ता प्रक्रिया अघि बढाउन लागेको हो । 

अहिले निजी कम्पनीले दैनिक ८० देखि १०० टिप्पर फोहर सिसडोलमा विसर्जन गर्दै आएका छन् । उनीहरूले त्यसरी विसर्जन गरेको फोहरवापत काठमाडौंमहानगरपालिकालाई प्रतिटिप्परको रु ३५० बुझाउने गरेका छन् । उनीहरूले दिने सेवा र लिने शुल्कमा एकरूपता ल्याउनका लागि पनि सूचीकृत गर्न लागिएको महानगर वातावरण विभाग प्रमुख हरिकुमार श्रेष्ठले बताए ।

उनले भने, “हामी छिट्टै नै निजी संस्थालाई सूचीकृत गर्न शुरू गर्नेछौं ।”

महानगरपालिकाका ३२ वडामध्ये अहिले आठ वडामा महानगरपालिका आफैँले र २४ वडामा निजी संस्थाले फोहर संकलन गर्दै आएका छन् । कतिपय संस्थाले फोहरको वर्गीकरणसमेत शुरू गरेको उनले बताए ।

उनले भने, “फोहरको दीर्घकालीन व्यवस्थापनका लागि वर्गीकरण मात्रै विकल्प भएकाले त्यसमा पनि उनीहरूसँग मिलेर काम गरिनेछ ।”

काठमाडौंमहानगरपालिकाले दैनिक ३५० मेट्रिकटन फोहर आफैं संकलन गरेर सिसडोलमा व्यवस्थापन गर्दै आएको प्रमुख श्रेष्ठले जानकारी दिए । सो कार्यका लागि महानगरपालिकासँग आफ्नै २१ टिप्पर छन् ।

काठमाडौंउपत्यकाका १८ पालिकाले सिसडोलमा फोहर विसर्जन गर्दै आएका छन् । सरकारले फोहर विसर्जनका लागि नुवाकोट जिल्लाकै बञ्चरेडाँडामा ल्याण्डफिल साइट निर्माण गरिरहेको छ ।