बुटवल- नेपाली कांग्रेस संसदीय दलका प्रमुख सचेतक बालकृष्ण खाँणले प्रधानमन्त्री केपी शर्मा ओली ज्ञानेन्द्र पथमा अगाडि बढेको आरोप लगाएका छन् । शक्ति केन्द्रिकृतकै दुष्प्रयासका कारण जनताले पूर्वराजा ज्ञानेन्द्रको सत्ता ढालिदिएको स्मरण गर्दै उनले शक्ति केन्द्रिकृतमा लागिरहे ओलीतन्त्र पनि समाप्त भएर जाने दाबी गरे ।

वीपी कोइराला अध्ययन प्रतिष्ठान बुटवलको अयोजनामा भएको वीपी कोइराला र वर्तमान सन्दर्भ विषयक विचार गोष्ठीलाई  सम्बोधन गर्दै नेता खाँणले प्रम ओली शक्तिको अत्यन्तै भोको रहेको र त्यसले उनलाई पतनको बाटोमा डोर्‍याएको उल्लेख गरे ।

‘ओलीलाई प्रधानमन्त्री मात्रै भएर पुगेन । राज्यका महत्वपूर्ण विभाग, अर्थ, गृह र अन्य विकास मन्त्रालयका अधिकार पनि सबै चाहिएको छ,’ नेता खाँणले भन्छन्, ‘ओलीले यसैगरी शक्ति केन्द्रिकृत गरिरहे र जनताका मौलिक हकहरू खोस्ने दुष्प्रयास जारी राखे ज्ञानेन्द्रकै नियति भोग्ने निश्चित छ ।’

लोकतान्त्रिक शासन पद्धतीमा हुनुपर्ने जवाफदेहिता,पारदर्शिता र जिम्मेवारीपन अहिलेको सरकारमा नदेखिएको वर्तमान परिप्रेक्ष्यमा वीपीका विचार र सिद्धान्तको सान्दभिर्कता झन् बढेको नेता खाँणले बताए । लोकतान्त्रिक शासन पद्धतीमै विश्वास नगर्ने कम्युनिस्टहरू सरकारका रहेकाले नागरिकका हक अधिकारको रक्षाका लागि वीपीका सिद्धान्त र विचारलाई आदर्श मान्नेहरू चनाखो हुनुपर्ने बेला आएको बताए । 

इन्काउन्टरको नाममा सरकार व्यक्ति हत्याका घटनामा संलग्न भएको आरोप पनि उनले लगाए । कुमार पौडेल हत्याको प्रसंग उल्लेख गर्दै नेता खाँणले भने, ‘गिरफतार भएका व्यक्तिलाई हातखुट्टा भाँचेर मार्न पाइन्छ ? यदि उनले गोली चलाए भन्ने हो भने हात भाँचिएका मान्छेले कसरी बन्दुक चलाए ? यदि उनले फायरिङ गरे भनेर मान्ने हो भनेपनि मारिएको व्यक्तिको हातखुट्टा किन भाँचियो त ?’ व्यक्ति हत्या र हिंसाको विरुद्धमा रहेका वीपी कोइरालाका सिद्धान्तलाई सबैले अंगाल्नुपर्नेमा उनले जोड दिए । 

विश्वका कुनैपनि कम्युनिस्टहरूले जनताको सर्वोच्तालाइ नस्वीकार्ने उल्लेख गर्दै उनले ओली सरकारले पनि नागरिकलाई मालिक नभई सरकारको सेवकका रूपमा लिएको बताए  । कार्यक्रममा कांग्रेस रुपन्देहीका सभापती अब्दुल रज्जाक, योजना आयोगका पूर्वउपाध्यक्ष डा.गोबिन्द पोख्रेल,वीपी कोइराला अध्ययन प्रतिष्ठान बुटवलका अध्यक्ष युवराज गिरी, बुटवल नगरसभापति खेलराज पाण्डे, खिमानन्द भट्टराईलगायतले बोल्दै नेपाली कांग्रेसले सदैव वीपीका विचार,सिद्धान्त र प्रजातान्त्रिक समाजवादलाई अंगालेर जनताको पक्षमा शसक्त आवाज उठाउने काम गरिरहेको बताए । 

गिरीको अध्यक्षतामा नयाँ कार्यसमिति चयन 

वीपी कोइराला अध्ययन प्रतिष्ठान बुटवलको तेश्रो अधिवेशनले युवराज गिरीको अध्यक्षतामा १५ सदस्यीय नयाँ कार्यसमिति चयन गरेको छ । जसको उपाध्यक्षमा बिमलराज भट्टराई, सचिवमा खिमानन्द भट्टराई, सहसचिवमा दिनानाथ गिरी तथा कृष्ण प्रसाद ज्ञवाली कोषाध्यक्षमा चयन भएका छन् ।

सदस्यहरूमा डोलप्रसाद अर्याल, शशीधर घिमिरे, बिनोद ज्ञवाली, सिता कार्की, राधा ज्ञवाली चयन भएका छन् । सुन्दरकुमार गहतराज लेखा समिति संयोजक चुनिएका छन् भने समितिका २ जना पछि मनोनयन गरिने छ । कार्यसमितिका एक जना उपाध्यक्ष र ४ जना सदस्य पनि कार्य समितिले पछि चयन गर्ने नवनिर्वाचित सचिव खिमानन्द भट्टराइले जानकारी दिए ।