जनकपुरधाम - भारतको 'आज तक'का नेपाल संवाददाता पंकज दासले शुक्रवार जनकपुरमा संचालन हुने रेलको नाउँ जानकी रहेको भन्दै इन्जिन सहितको तस्विर सामाजिक संजाल फेसबुकमा पोष्ट गरेपछि  सामाजिक सञ्जालमा चर्चाको विषय बनेको छ ।

भारतको गोरखपुर हुँदै दिल्ली गइरहेका दासले संयोगवश उक्त इन्जिन गोरखपुर स्टेसनमा देखेका थिए । ‘जानकी नाम सहितको इन्जिन गोरखपुर स्टेसनमा देखे पछि त्यहाँ जानकारी लिन खोज्दा उक्त इन्जिन नेपालको लागि रहेको तथा अहिले ट्रायलका लागि सीतामढी—रक्सौल ट्रयाकमा पठाईएको छ,’ दासले लोकान्तरसँग भने, ‘गोरखपुर स्टेसनबाट शुक्रवार नै रक्सौलका लागि उक्त इन्जिन पठाईएको छ ।’

भारतकै वाल्मिकीनगर, रामनगर, नरकटियागंज, बेतिया, सुगौली हुँदै रक्सौल पुगेर सीतामढीसम्म पुग्ने गोरखपुरका रेल्वे विभागका कर्मचारीबाट जानकारी प्राप्त भएको दासले दाबी गरे ।

नेपाललाई बिक्री गरिने उक्त रेल भारतको जयनगरदेखि नेपालको जनकपुरसम्म सञ्चालन हुने भएकाले अहिले परीक्षणका लागि सीतामढी—रक्सौल रुटमा ट्रायलका लागि पठाइएको छ । ‘रेल्वेको ट्रयाकमा केही समस्या भएकाले तत्काल बोगी भने नपठाइए पनि इन्जिन मात्र परीक्षणका लागि पठाएको आफूलाई गोरखपुर रेल्वेका पदाधिकारीले जानकारी दिएका छन्,’ दासले थपे, ‘ भारत सरकारले रेल्वे लाईन र पेट्रोलियम पाइपलाइनको एक साथ उदघाटन गर्ने तयारी गरिरहेकाले पनि छिटै रेल्वे हस्तान्तरण गर्ने काम अघि बढेको हो ।’

एता रेल्वेको इन्जिनको नाउँ जानकी नै रहेको भन्नेबारे नेपाल सरकारले कुनै निर्णय भने अहिले नगरेको रेल विभागका महानिर्देशक बलराम मिश्रले बताए । ‘अहिले सामाजिक संजालमा रेल इन्जिन जानकी नेपालमा नै आयो भनेर कतिपयले लेखिरहेका छन्,’ महानिर्देशक मिश्रले भने, ‘त्यस्तो केही पनि छैन, निराधार कुरा हो ।’

‘भौतिक पूर्वाधार विकास मन्त्री रघुवीर महासेठ ज्यूसँग मेरो निजी कुराकानी हुँदा २ वटा रेल इन्जिनमध्ये एउटाको नाउँ जानकी नै राख्ने भन्ने छलफल गरेका छौं, मिश्रले लोकान्तरसँगको कुराकानीमा भने, ‘अर्को इन्जिनको नाउँ पशुपति वा सगरमाथा राख्ने भन्ने छलफल मात्र गरेका छौं ।’ यद्यपि नेपाल सरकारले त्यससम्बन्धी कुनै पनि औपचारिक निर्णय भने गरेको छैन ।

'जानकी' नै इन्जिनको नाउँ हो भनेर भन्नु अहिले धेरै छिटो हुने मिश्रले बताए । अहिले त फ्याक्ट्रीमा रेलको इन्जिन र बोगी बनिरहेकै कारण रेल र इन्जिन नेपाल आउन अझै ३ महिनासम्म लाग्न सक्छ । केही दिनमा हामी भारतको रेल कम्पनीमा गएर हेर्छौं, उनले बताए ।

नेपाल सरकारले भारतको मद्रासस्थित कोंकर्ण रेल्वे इन्टरनेशनल कर्पोरेसनसँग २ सेट रेल किन्ने सम्झौता गरेको छ । नेपाली रुपैयाँ ८४ करोड ६५ लाखमा २ वटा इन्जिन र ५ वटा कोच (बोगी ) किन्ने सम्झौता भएको छ । जस मध्ये केही रकम भुक्तानी समेत भइसकेको रेल्वे विभागका महानिर्देशक मिश्रले बताए ।