धनगढी- कैलालीका विभिन्न स्थानमा छ्यापछापती नक्कली नोट भेटिन थालेका छन् । रातिका समयमा अपरिचित व्यक्तिहरु विभिन्न पसलमा गई झुक्याएर १ हजारको नक्कली नोटको सामान खरिद गर्ने गरेको पाइएको छ ।

ईलाका प्रहरी कार्यालय हसुलियाका सई रामचन्द्र पन्तले ग्रामीण भेगहरुमा १ हजारको नक्कली नोटहरु फेला पर्न थालेको जानकारी दिए । उनका अनुसार मंगलबार राति जिल्लाको कैलारी गाउँपालिका–२ कैलारी मण्डीस्थित दयाशंकर चौधरीको होटलबाट नोट फेला परेको हो ।

रातिको समयमा एक जना अपरिचित व्यक्तिले सो होटलमा नक्कली १ हजार रुपैयाँ दिँदै १ बोतल बियर र १ बोतल रेडबुल मागेको र बाँकी पाउँनुपर्ने देखिने पैसा पनि लिएर गएको होटल सञ्चालकलाई उदृत गर्दै सई पन्तले जानकारी दिए ।

नक्कली नोट फेला परेपछि गाउँपालिकास्थित विभिन्न स्थानमा प्रहरीले नक्कली नोट देखाउँदै सार्वसाधारणलाई सचेत गराउन थालेको छ । सई पन्तले पैसाको कारोबार गर्दा राम्ररी पहिचान गरेर मात्रै कारोबार तथा लेनदेन गर्न अनुरोध गर्दै नक्कली नोटवारे ठाउँ–ठाउँमा सचेतीकरण गराइरहेको बताए ।

साथै नक्कली नोटको कारोबारीहरुलाई नियन्त्रणमा लिन समयमा प्रहरीलाई खबर गर्न अनुरोध समेत गरे । यसैबीच धनगढीमा पनि नक्कली नोटहरु भेटिएका छन् । बुधबार सक्कली जस्तै देखिने एक हजारको नक्कली नोट धनगढीको पिपल चौतारास्थित तरकारी पसलमा फेला परेको हो ।

प्रहरीका अनुसार नक्कली नोट सक्कली भन्दा सानो छ । भने चौडाई पनि कम छ । सुरक्षाका लागि नोटमा राखिने धागो नक्कली छ । सामान्यतः नोटमा कागजको गुणस्तर, धागो, पानी छाप हेरेर सक्कली हो वा नक्कली भनेर छुट्ट्याउन सकिने हुन्छ ।

तर कारोबारीहरुले रातिको समयमा झुक्याउने हुुँदा राम्ररी पहिचान गरेर मात्रै लेनदेन गर्न प्रहरीको अनुरोध छ ।