सुर्खेतमा कोल्ड स्टोर खुल्दै, तरकारी र आलुको बीऊ राख्ने तयारी

साउन २९, २०७६

सुर्खेत- कर्णाली प्रदेशको राजधानी वीरेन्द्रनगरमा कोल्ड स्टोर सञ्चालन हुने भएको छ । जिल्लाको भेरी गंगा नगरपालिकाको वडा नं. १० झिलिमिलीमा उक्त कोल्ड सेन्टर सञ्चालनमा आउन लागेको हो ।

भेरी गंगा नगरपालिकाको ६५ लाख, गुर्भाकोट नपाको ५ लाख, भूमि व्यवस्था कृषि तथा सहकारी मनत्रालयको १५ लाख गरी एक करोड ५९ लाखको लागतमा सेन्टर सञ्चालनमा आउन लागेको नारी जागरण बहुउद्देषीय कृषक समुहका अध्यक्ष ज्ञानु भुसालले जानकारी दिइन् ।


ADVERTISEMENT

‘८ सय भन्दा बढी जनताको शेयर लगानी गरेका छौं,' उनले भनिन्, ‘८५ ओटा समुहमा रहेका जनताको लगानी गरिएको हो ।’

संस्थामा आवद्ध सबैले आलुको बीउ उत्पादन गर्ने गरेको उनको भनाई छ । ‘हामी सबैले पहिलो, दोश्रो् र तेश्रो पुस्ताको बीऊ उत्पादन गरिरहेका छौं, बीऊलाई कोल्ड स्टोर नहुँदा बचाउन गाह्रो भइरहेको थियो ।’

यसअघि कोहलपुरको कोल्ड स्टोर प्रयोग गर्दा बढी खर्चालु हुने गरेको उनको भनाई छ । ‘दुइ सय मे.टन आलुको बीऊ राख्न मिल्ने क्षमताको कोल्ड स्टोर बनाएका हौं,' उनले भनिन्, ‘बिजुलीको तीन फेज लाइन नभएका कारण अहिले सञ्चालनमा ल्याउन नसकेका हौं । अब आफ्नै ट्रान्सफर्मर ल्याएका कारण केही दिनमा हामी शुरू गर्छौं ।’ तर कोल्ड स्टोरको छतलाई हावाले उडाइदिएको छ ।

‘असार ११ गते राती आएको हावा हुरीले हाम्रो कोल्ड सेन्टरको छानो उडाइ दिएको छ,' उनी गुनासो गर्छिन्, ‘इन्जिनीयरले अब छाना बनाउन साढे बाह्र लाख लाग्ने बताएका छन् । लगानी जुटाइरहेका छौं ।’ समुहका सदस्यहरुले बेसार खेती पनि गरिरहेको तथा अन्य तरकारी खेतीसमेत गरिरहेको बताइन् ।

‘हामीलाई कोल्ड स्टोर नभएका कारण तरकारीको जगेर्ना गर्न गाह्रो भइरहेको थियो,' उनले भनिन्, ‘तर अब हामीलाई सहज भएको छ । कम खर्चिलो छ ।’

उनले प्रति किलो ४ रुपैंयाका दरले सेवा लिने निर्णय भइसकेको बताइन् । यता, भूमि व्यवस्था कृषि तथा सहकारी मन्त्री विमला केसी मन्त्रालयले अन्य केहि सहयोग गर्नुपरे तयार रहेको बताइन् । ‘हामी जस्तोसुकै सहयोग गर्न पनि तयार छौं,' मन्त्री केसीले भनिन्, ‘तरकारी तथा अन्य बालीमा कर्णालीलाई कसरी आत्मनिर्भर बनाउन सकिन्छ भन्नेमा सरकार लागिरहेको छ । सबैको साथ र सहयोगको अपेक्षा छ ।'

साउन २९, २०७६ मा प्रकाशित

शेरबहादुर थापा

थापा लोकान्तरकालागि कर्णाली प्रदेशका प्रतिनिधि हुन् ।

लेखकबाट थप...

प्रतिक्रिया दिनुहोस