काठमाडौं – शनिवार राति अफगानिस्तानको काबुलमा आयोजित एक विवाह समारोहमा गरिएको आत्मघाती बम आक्रमणमा ६३ जना मारिएका छन् । यस घटनाले देशको भविष्यलाई अनिश्चित बनाएको छ । 

अमेरिकाले तालिबानसँग वार्ता गरेर विगत १८ वर्षदेखि चलिरहेको द्वन्द्व अन्त्य गर्न खोजेको छ । उक्त द्वन्द्वले एउटा पुस्तालाई नै असर पार्‍यो अनि दशौं हजार मानिस मारिए । अमेरिका र तालिबानबीचको वार्ताले काबुल सरकारलाई किनारामा पारेको छ र ऊ निकै निराश भएको छ । 

उता इस्लामिक स्टेट नामक आतंकवादी संगठनको अफगानिस्तान शाखाले दिनानुदिन प्रभाव बढाउँदै लगेको छ । शनिवारको आक्रमण पनि उसैले गराएको बताइएको छ । अमेरिका र तालिबानबीच सम्झौता भए पनि अफगानी नागरिक मारिने सिलसिला चलिरहने संकेत यसबाट प्राप्त भएको छ । 

शनिवारको आक्रमण काबुलमा रहेको शियाबहुल क्षेत्रमा गरिएको थियो । त्यसो त इस्लामिक स्टेटले सयौं अल्पसंख्यक शिया हजाराहरूलाई आत्मघाती आक्रमणमा मारेको छ । यो अतिवादी समूह सिरिया र इराकमा आईएसको प्रभाव बढेसँगै अफगानिस्तानमा देखिएको थियो । यसले विश्वव्यापी खलिफा बनाउनका लागि अफगान सरकारलाई सत्ताच्युत गर्न चाहेको छ । इराक र सिरियामा कब्जा गरेको सबै भूभाग इस्लामिक स्टेटले गुमाएको भए पनि त्यसको अफगानिस्तान शाखाले प्रभाव विस्तार गर्न खोजिरहेकै छ । 

तालिबान र आईएसको विचारधारा र रणनीति फरक छन् । तालिबानले सरकारी अधिकारी अनि अफगान तथा अन्तर्राष्ट्रिय सुरक्षाबललाई तारो बनाउने गरेका छन् । 

त्यसो त तालिबान र आईएस पनि थुप्रैपटक एकअर्कासँग भिडिसकेका छन् अनि तालिबान अझै पनि ठूलो र प्रभावशाली शक्ति हो । संयुक्त राष्ट्रसंघले हालै जारी गरेको प्रतिवेदनमा अफगानिस्तानमा आईएस लडाकूहरू २५ सयदेख ४ हजारको बीचमा रहेको अनुमान गरेको छ ।

एपीबाट