इरानी ट्यांकर गयो ग्रीसतर्फ, अमेरिकालाई इरानको चुनौती

भदौ २, २०७६

काठमाडौं – जिब्राल्टर नजिक नियन्त्रणमुक्त गरिएपछि इरानको एक ट्यांकर भूमध्यसागर हुँदै सोमवार ग्रीसतर्फ गएको छ । 

अमेरिकाले यो ट्यांकर फेरि कब्जा गर्न खोजेमा त्यसको भारी मूल्य चुकाउनुपर्ने तेहरानले चेतावनी दिएको छ । 


ADVERTISEMENT

ग्रेस १ नामक उक्त ट्यांकरको नाम परिवर्तन गरेर एड्रियन दर्या १ राखिएको थियो । त्यसलाई जिब्राल्टरबाट आइतवार राति ११ बजे मुक्त गरिएको थियो । जहाजको गति ट्य्राक गर्ने यन्त्रले सोमवार उक्त ट्यांकर ग्रीसको कालामातातर्फ गइरहेको र आइतवार त्यहाँ पुग्ने देखाएको छ । 

गत जुलाई महिनाको ४ तारिखमा ब्रिटिश रोयल मरिन्सले उक्त ट्यांकर कब्जामा लिएका थिए । युरोपेली संघको प्रतिबन्ध उल्लंघन गर्दै यसले सिरियातर्फ तेल लगिरहेको शंका गरेर कब्जामा लिइएको थियो । ट्यांकर कब्जामा लिइएपछि तेहरान र पश्चिमबीच हप्तौंसम्म गतिरोध थियो । खाडी हुँदै अन्तर्राष्ट्रिय तेल जहाजको यातायातमा यसले गर्दा तनाव आएको थियो । 

जिब्राल्टर बेलायत अधीनस्थ भूभाग हो र उसले बिहीवार नियन्त्रण आदेश फिर्ता लिएको थियो । तर वाशिङटनको एक संघीय अदालतले त्यसको भोलिपल्छ ट्यांकर, त्यसमा रहेको तेल र लगभग १० लाख डलर कब्जामा लिनका लागि पुर्जी जारी गरेको थियो ।

जिब्राल्टरले आइतवार वाशिङटनको अनुरोध पूरा गर्न नसक्ने किनकि आफू युरोपेली संघको कानूनमा बाँधिएको बताएको थियो । वाशिङटनले चाहिँ ट्यांकर इरानको इस्लामिक रिभोल्युसनरी गार्ड कोर्प्ससँग सम्बन्धित रहेको भन्दै नियन्त्रणमा लिन खोजेको थियो । उक्त संगठनलाई अमेरिकाले आतंकवादी संगठन घोषणा गरेको छ ।

एजेन्सी

भदौ २, २०७६ मा प्रकाशित

प्रतिक्रिया दिनुहोस