काठमाडौं – भारतीय सैनिकहरूले दुईजना नागरिकलाई गोली हानी मारेको पाकिस्तानले आरोप लगाएको छ । नियन्त्रण रेखापारि गोली हानेर ती दुईजनालाई मारिएको र अर्का एकजनालाई घाइते बनाएको पाकिस्तानको भनाइ छ । 

सीमावर्ती गाउँहरू हट स्प्रिङ र चिरिकोटमा भारतले युद्धविराम उल्लंघन गर्दै आइतवार नागरिकहरूलाई मारेको पाकिस्तानको परराष्ट्र मन्त्रालयले जनाएको छ । 

भारत सरकारले कश्मीरको स्वायत्तता हटाएर कर्फ्यु लगाएपछि उक्त क्षेत्र तनावग्रस्त छ । 

कश्मीरमा कर्फ्यु लगाइएपछि ४ हजारभन्दा बढी मानिसलाई पक्राउ गरिएको भारतको न्यायपालिकाका स्रोतहरूले बताए । 

एएफपी समाचार संस्थासँग नाम नबताउने शर्तमा एक मजिस्ट्रेटले बताएअनुुसार, हजारौं मानिसलाई सार्वजनिक सुरक्षा ऐनअन्तर्गत पक्राउ गरिएको छ । 

‘पक्राउ गरिएका अधिकांशलाई कश्मीरबाहिर लगिएको छ किनकि यहाँका कारागारमा कैदी राख्ने ठाउँ खाली छैन,’ मजिस्ट्रेटले बताए ।

एजेन्सी