काठमाडौं– नेपाल अटो मोबाइल डिलर्स एसोसियसन (नाडा)ले आयोजना गर्न लागेको नाडा अटोशोमा महिन्द्राका दुई नयाँ मोडलहरु सार्वजनिक हुने भएका छन् ।

महिन्द्रा एण्ड महिन्द्रा लिमिटेडको नेपालका लागि प्यासेन्जर भेहिकलहरुको आधिकारीक वितरक अग्नी इन्कर्पोरेटेडले आगामी १० भदौ देखि हुन लागेको नाडा अटोशोमा महिन्द्राको पछिल्लो उत्पादनहरु ‘एक्सयूभी–३००’ र ‘महिन्द्रा मराजो’ नेपाली बजारमा सार्वजनिक गर्न लागेको हो ।

महिन्द्रा एक्सयूभी– ३०० नेपाली बजारमा निकै प्रतिक्षा गरिएको मिड साईज एसयूभी रहेको अग्नी इन्कर्पोरेटले जानकारी दिएको छ ।

त्यस्तै महिन्द्रा मराजो पनि निकै चर्चामा रहेको र आगामी १० गते देखि चल्ने नाडा अटोशोमा मुख्य आकर्षणको रुपमा रहने अग्नी इन्कर्पोरेसनले जानकारी दिएको छ ।

महिन्द्राका अनुसार दुवै मोडेलका आकर्षक विशेषता रहेका छन् र नेपाली बजारमा मुख्य आकर्षणको रुपमा रहने छन् ।

के छन् महिन्द्रा एक्सयूभी–३००का विशेषता?

महिन्द्राको लेटेस्ट एसयूभी महिन्द्रा एक्सयूभी–३०० नेपाली बजारमा निकै प्रतिक्षा गरिएको मिड साईज एसयूभी हो । महिन्द्राको नयाँ प्लाटफर्म ‘एक्स–१००’ अवधारणामा आधारित एक्सयूभी–३०० को डिजाइन निकै आक्रामक रहेको छ ।

यसमा आकर्षक सनरुफका साथै, एलईडी डेटाइम रनिङ्ग–लाइट, पुश स्टार्ट–स्टप बटन, टचस्क्रिन इन्फोटेनमेन्ट सिस्टम, डबल जोन क्लाइमेट कन्ट्रोल लगायतका विशेषता उपलब्ध रहेका महिन्द्राले छन् । 

एक्सयूभी ३०० मा ७ ओटा फस्टइन सेग्मेन्ट फिचर दिइएको छ । सात वटा एयरब्याग, चारै चक्कामा डिस्क–ब्रेक, १७ इन्च अलोय–ह्वील, ईबीडी तथा एबीएस जस्ता अत्याधुनिक विशेषताले एक्सयूभी–३०० निकै सुरक्षीत गाडी बनेको छ । 

नयाँ एसयूभी १ दशमलव २ लिटर टर्बो पेट्रोल र साढे १ लिटर डिजेल इन्जिनमा उपलब्ध रहेको छ । यसमा उपलब्ध १ दशमलव २ लिटर पेट्रोल इन्जिनले ५ हजार आरपीएममा ११० पीएस पावरका साथै २ हजार  देखि ३५ सय आरपीएममा २ सय  एनएम–टर्क उत्पादन गर्छ । 

साथै, १ दशमलव ५ लिटर डिजेल इन्जिनले ३७ सय ५० आरपीएममा ११५ पीएस पावरका साथै १५ सय देखि २५ सय आरपीएममा ३०० एनएम–टर्क उत्पादन गर्ने महिन्द्राले जानकारी दिएको छ । उक्त गाडीले युवा पुस्तालाई आकर्षित गर्ने अग्नी इन्कर्पोरेटको आपेक्षा रहेको छ ।

के छन् महिन्द्रा मराजोका विशेषता?

निकै चर्चामा रहेको महिन्द्राको पहिलो एमपीभी मराजो पनि यस वर्षको नाडा अटोशोमा मुख्य आकर्षणको रुपमा रहने आपेक्षा गरिएको छ ।

मराजोको डिजाइन सार्क माछाबाट प्रेरित भएको र कारको केही भागहरू शिकारी सार्क माछाको डिजाइनबाट प्रेरित भएर निर्माण गरिएको छ ।

महिन्द्रा मराजो कम्पनीको अहिलेसम्मको सबैभन्दा ठूलो प्यासेन्जर भेइकल हो । यसलाई ७ र ८ सिट अप्सनमा बजारमा उपलब्ध गराइएको छ । मराजोका सबै भेरिएन्टमा एबीएस र ईबीडी तथा ब्रेक असिष्ट, स्टायडर्ड रुपमा दुईवटा एयरब्याग तथा चाइल्ड सिटलगायतका सुरक्षा फिचरहरू दिइएको छ ।

मराजो कारको क्याविनको छतमा एयर कन्डिसनिङ्ग भेन्ट सिस्टम जडान गरिएको छ । त्यस्तै कारको सेन्टर कन्सोलमा ठूलो टचस्क्रिन सहितको इन्फोटेनमेन्ट सिस्टम दिइएको छ । 
कारमा थ्री–स्पोक स्टेयरिङ्ग ह्वील रहेको छ, जसमा अडियो, ब्लू–टुथ टेलेफोनिक र क्रूज कन्ट्रोलको सुविधा रहेको छ ।

महिन्द्रा मराजोमा नयाँ साढे १ लिटर, ४ सिलिन्डर डिजेल इन्जिन छ । जसले ३५ सय आरपीएममा १२१ हर्स पावर र १७ सय ५० देखि२५ सय  आरपीएममा ३०० एनएम–टर्क उत्पादन गर्छ ।

भारतीय बजारमा सार्वजनिक भएको छोटो समयमा नै आफ्नो अलगै पहिचान बनाउन सफल यी दुई गाडीले नेपाली बजारमा निकै राम्रो बजार बिस्तार गर्ने आपेक्षा अग्नी इन्कर्पोरेटले राखेको छ ।

महिन्द्राले उत्पादन गरेको स्पोर्टस यूटिलीटी भेइकल (एसयूभी) ‘एक्सयूभी–३००’ र कम्पनीकै पहिलो लग्जरी मल्टि पर्पोज भेइकल (एमपीभी)  ‘मराजो’ले नाडा अटो शो २०१९ मा सबैको ध्यान खिच्ने आपेक्षा अग्नीले गरेको छ ।