पाल्पा - कुनै समय रिफर सेण्टरका रुपमा ख्याती पाएको जिल्ला अस्पतालको गुणस्तर सुधार हुँदै गएको छ । सामान्य रुघाखोकीको समस्या लिएर जिल्ला अस्पताल आउनेलाई पनि पोखरा जानुस् भनेर रिफर गर्ने अस्पतालले यस वर्षदेखि शल्यक्रिया र डायलासिस सेवा शुरु गरेको हो ।

सरकारी अस्पतालको विश्वास नलागेरै धेरैजसो बिरामी सामान्य औषधि पसलले स्थानीय एफएम र पत्रपत्रिकामा गरेका विज्ञापनका भरमा हरेक शनिबार मेडिकल हलमा लामो लाइन लाग्ने गरेका बेला अस्पतालले नयाँ सेवा सञ्चालनमा ल्याएको जनाएको छ ।

पछिल्लो समय अस्पतालमा सामान्य शल्यक्रिया सेवादेखि मिर्गौलाको डायलासिससमेत गर्ने गरी अस्पताल प्रशासन र विकास समिति लागि परेको हो । गत वर्षदेखि निर्माणाधीन अस्पतालको आधुनिक भवन ५० शय्याको बन्दैछ ।

अस्पताल विकास समितिका अनुसार एक महीनाभित्रै डिजिटल एक्सरे सेवा सञ्चालन हुँदैछ । भिडियो एक्सरे (अल्ट्रासाउन्ड) र मुटुको इको सेवा सञ्चालन पनि हुने भएको छ । मिर्गौलाको डायलासिस थपिँदैछ । एनआइसीयु (बच्चाहरूको सघन उपचार) सेवाको पनि तयारी भइरहेको अस्पताल विकास समितिले जनाएको छ । ल्याबमा सोडियम पोटासियमको परीक्षण गर्ने सेवा थपिने भएको छ ।

'हामीले यो वर्ष सेवामा फड्को मार्दैछौँ”, समितिका अध्यक्ष गोविन्द पहाडीले भने, 'यी सेवा थप्न सबैतिरको सकारात्मक सहयोग रहेको छ ।'

अस्पतालमा सञ्चालित ल्याबमा रगतसँग सम्बन्धित ८० वटासम्म परीक्षण गर्न मिल्ने मेसिन खरीदको तयारी भइरहेको उनले बताए ।

त्यस्तै विद्युत् नहुँदा एक्सरे, ल्याबलगायत सेवा सञ्चालन गर्न ‘ब्याकअप सिस्टम’ को पनि व्यवस्था चालू आवभित्रै गरिने उनले जानकारी दिए । हाल १५ शय्याको अस्पतालको क्षमता बढाएर ५० पु¥याउने प्रक्रिया शुरु भई भवन निर्माणको काम भइरहेको छ ।

आवश्यक जनशक्ति व्यवस्थापनबारे सरकारले चासो नदिएको अस्पताल व्यवस्थापनले जनाएको छ । व्यवस्थापनका पदाधिकारीले धेरैपटक प्रदेश र केन्द्रका निकायमा गरेको आग्रहबारे सुनुवाइ नभएको उनले बताए ।

अस्पतालमा जटिल सुत्केरी, एपेन्डिक्स, हाइड्रोशील लगायतका सामान्य अप्रेसन सेवा शुरु भएको तीन वर्ष पुग्यो । त्यसबाहेक उच्च प्रविधिको डिजिटल एक्सरे सेवा, थाइराइड परीक्षण, रगतको जाँच चौबिसै घण्टा सेवा विस्तार गरेको छ । तर, दरबन्दीअनुसारको जनशक्ति नभएका कारण प्रभावकारी हुन सकेको छैन । मिर्गाैलाको डायलासिस थप्न गण्डकी प्रदेश सरकारले रु १० लाख बजेट विनियोजन गरेको छ । उक्त बजेटमा केही थप गरेर पाँच वटा डायलासिस मेसिन ल्याउने तयारी अस्पतालले गरेको छ ।