काठमाडौं – अमेरिकामा महिला वैज्ञानिकहरूले पुरुषकै जस्तो मेहनत र प्रतिभा भए पनि आफूहरूमाथि भेदभाव गरिएको भन्दै कार्यस्थलमा बस्दा आफ्नो अनुहारमा दाह्रीजुंगा टाँसेका छन् । 

वनस्पति विज्ञानकी प्राध्यापक एलन करेनोले कार्यस्थलमा महिला वैज्ञानिकहरूमाथि हुने भेदभावविरुद्ध यो अभियान शुरू गरेका हुन् । 

महिला वैज्ञानिकहरूले मिलेर बीयर्डेड लेडी प्रोजेक्ट शुरू गरेका हुन् । महिला वैज्ञानिकहरूको योगदान पुरुषहरूको भन्दा कम नहुनेतर्फ मानिसहरूको ध्यान आकर्षण गर्न यो अभियान चलाइएको हो । 

टीभीमा विज्ञका रूपमा पुरुष वैज्ञानिकहरूलाई मात्र बोलाइने गरेको महिला वैज्ञानिकहरूको आरोप छ । लैंगिक भेदभावयुक्त सोचलाई व्यंग्य गर्न आफूहरू दाह्री टाँसेर उनीहरू जस्तो देखिने महिला वैज्ञानिकहरूको भनाइ छ । 

महिला समानताको यस अभियानलाई सामाजिक सञ्जालमा  समर्थन प्राप्त भइरहेको छ ।

एजेन्सी