तस्करी भइरहेको कपडासहित कार बरामद

भदौ २६, २०७६

बुटवल – रूपन्देहीको नेपाल–भारत सीमा क्षेत्र भैरहवाबाट तस्करी भएर अवैध रुपमा नेपाल भित्र्याउँदै गरेको कपडासहित एउटा कार सशस्त्र प्रहरीले बरामद गरेको छ ।

कारमा महिलाले प्रयोग गर्ने कपडा भेटिएका छन् । जिल्लाको सिद्धार्थनगर नगरपालिका–१ डण्डापुल नजिकै भारतबाट तस्करी गरी नेपाल ल्याउँदै गरेको १ लाख ५२ हजार रुपैयाँ बराबरको लेडिज टप्स कपडा बरामद गरिएको हो ।


ADVERTISEMENT

सशस्त्र प्रहरी बल नेपाल ३८ नम्बर गुल्म हेडक्र्वाटर, राजस्व भन्सार सुरक्षा प्रमुख डीएसपी गोविन्दबहादुर खातीले सशस्त्र प्रहरीको भन्सार सुरक्षा गस्तीले चेकजाँचको क्रममा बा७च ५९५४ नम्बरको मारुती सुजुकी कारमा लुकाएर ल्याउँदै गरेको अवस्थामा १ हजार १६ टप्स बरामद गरेको बताए ।

सामान ल्याउन प्रयोग गरिएको कार पनि सशस्त्रले नियन्त्रणमा लिएको छ । कपडा र कार भैरहवा भन्सार कार्यालय चलान गरिएको सशस्त्र प्रहरीले जनाएको छ । कारको मूल्यांकन १२ लाख राखिएको डीएसपी खातीले बताए ।

भारतीय बजार सुनौलीबाट बुटवल ल्याउँदै गरेको कपडा कारको सिटमुनि र डिक्कीमा लुकाएर ल्याइएको थियो । सशस्त्रले सवारी चालकलाई समेत नियन्त्रणमा लिई भन्सार कार्यालय चलान गरेको जनाएको छ ।

तस्करले प्रहरीलाई छलेर अवैध सामान नेपाल भित्र्याउँदै आएका छन् । चाडपर्व नजिकिँदै जाँदा अवैध रुपमा चोरीनिकासी गर्नेक्रम समेत बढ्न थालेको छ । चोरी निकासी बढ्न थालेपछि सुरक्षा निकायले पनि सक्रियता बढाउन थालेका छन् ।

केही समय अगाडि दिल्ली–बुटवल र दिल्ली–काठमाडौं चल्ने गाडीबाट पनि लाखौं रुपैयाँ बराबरको कपडा बरामद गरेको थियो । खुला सीमाको फाइदा उठाउँदै तस्करले भारतीय बजारबाट खरिद गरी अवैधरुपमा नेपाली बजारमा सामान भित्र्याउँदै आएका छन् ।

डीएसपी खातीले राजस्व चुहावट र चोरीतस्करी नियन्त्रण गर्न सशस्त्रले विशेष योजना बनाएर अघि बढेको जानकारी दिए ।

भदौ २६, २०७६ मा प्रकाशित

प्रकाश आचार्य

प्रकाश आचार्य लोकान्तरका लागि ५ नम्बर प्रदेशका प्रतिनिधि हुन् ।

लेखकबाट थप...

प्रतिक्रिया दिनुहोस