संविधान दिवसमा प्रधानमन्त्रीको अपिल– बाटो भुलिरहेकाहरू मूलधारमा आउनुस्

'अग्रगतिका लागि तगारो बने मात्र संविधान संशोधन'
फाइल फोटो
असोज ३, २०७६

काठमाडौं – प्रधानमन्त्री केपी शर्मा ओलीले संविधान कार्यान्वयनमा कोही पक्ष र कोही प्रतिपक्ष नरहेको बताएका छन् । 

संविधान दिवसका अवसरमा टुंडिखेलमा आयोजित विशेष समारोहलाई सम्बोधन गर्दै प्रधानमन्त्री ओलीले संविधानका सबालमा सबै बराबर रहेको बताए ।


ADVERTISEMENT

रानीतिक आन्दोलनको चरण समाप्त भइसकेको भन्दै प्रधानमन्त्री ओलीले सरकार लोकतन्त्रका आधार बलियो पार्न लागि परेको बताए ।

'जनता लोकतन्त्रका आधार हुन्, जनता बलियो हुँदा लोकतन्त्रका संस्था र प्रणाली सुदृढ हुन्छन्,' प्रधानमन्त्री ओलीले भने, 'राज्य र नागरिकको बीचमा उच्च स्तरको समझदारी र एकता कायम गर्न प्रतिबद्ध छौं ।'

प्रधानमन्त्री ओलीले अतिवादी सोच राख्ने शक्तिहरूलाई पनि मूलधारमा आउन आग्रह गरे ।

'यसबीचमा अतिवादी सोच भएकाहरूलाई पनि मूलधारमा ल्याउन सफल भएका छौं,' प्रधानमन्त्री ओलीले भने, 'बाटो भुलिरहेका अन्यलाई पनि मूलधारमा आउन ढिला नगर्न आग्रह गर्दछु ।'

प्रधानमन्त्री ओलीले संविधान संशोधन आवश्यकताका आधारमा मात्र गरिने बताए ।

'जुन बेला जे मिल्दैन, वा जुन कुरा अग्रगतिका लागि तगारो बन्छ त्यसलाई त्यही बेला विधिसम्मत् ढंगले मिलाउँदै अगाडि बढ्न सकिन्छ,’ प्रधानमन्त्री ओलीले भने ।

प्रधानमन्त्री ओलीले सरकारको कामलाई प्रभावकारी बनाउन प्रधानमन्त्री र मन्त्री तथा मन्त्री र सचिवहरूबीच कार्यसम्पादन सम्झौता गरिएको, प्रदेशको काम प्रभावकारी बनाउन वरिष्ठ सह–सचिवहरूलाई प्रदेशमा पठाइएको, राष्ट्रिय गौरवका आयोजनालाई यथासक्य छिटो सम्पन्न गर्न टाइम लाइन सेट गरिएको बताए ।

यसैगरी टिमुरेमा सुख्खा बन्दरगाह निर्माण अन्तिम चरणमा रहेको, एक वर्षभित्र गौतमबुद्ध विमानस्थल र अर्को वर्ष पोखरा क्षेत्रीय अन्तर्राष्ट्रिय विमानस्थल निर्माण सम्पन्न भइसक्ने, धौवादी फलाम  खानी निर्माणसँगै सुरुङ मार्ग, रेल मार्ग हुँदै पानीजहाजको सपना साकार पार्ने दिशामा अघि बढेको पनि प्रधानमन्त्री ओलीले बताए ।

साथै उनले नजिकिँदै गरेका दशैंतिहार जस्ता ठूला चाडबाडका लागि शुभकामना समेत व्यक्त गरे ।

असोज ३, २०७६ मा प्रकाशित

प्रतिक्रिया दिनुहोस