काठमाडौं – नयाँ बसपार्कस्थित मित्रनगरमा वृक्षरोपण गरिएको छ ।

मित्रनगर विकास तथा सुधार समितिको आयोजनामा शनिवार बिहान चक्रपथ क्षेत्रदेखि म्हैपी मितेरी पुलसम्म वृक्षरोपण गरिएको हो । 

बृहत् वृक्षरोपण कार्यक्रमको उद्घाटन गर्दै काठमाडौं क्षेत्र नम्बर ६ का सांसद भीमसेनदास प्रधानले यो वर्षलाई सरकारले वृक्षरोपण वर्ष घोषणा गरेपनि वृक्षरोपण कार्य प्रभावकारी हुन नसकेको बताए ।

‘रुख बिरुवा मासिनुका साथै जनसंख्या वृद्धिका कारण उपत्यकामा तापक्रम दिनानुदिन बढ्दै गएको छ, तापक्रम न्यूनीकरण गरी स्वच्छ, सफा शहर निर्माणमा वृक्षरोपणले सहयोग पुग्नेछ,’ उनले भने । 

पूर्व रक्षामन्त्री प्रधानले सुन्दर, शान्त र हराभरा काठमाडौं निर्माणका लागि सांसद विकास कोषबाट सहयोग गर्ने प्रतिबद्धता समेत व्यक्त गरे । काठमाडौं महानगरपालिका–२६ का अध्यक्ष ख्यामराज तिवारीले मित्रनगर क्षेत्रलाई सफा, सुन्दर र हरियाली बनाउन वृक्षरोपण कार्यक्रमले सहयोग पुग्ने विश्वास व्यक्त गरे ।

पछिल्लो समय नेपालको राष्ट्रिय बसपार्कका रुपमा रहेको नयाँ बसपार्क क्षेत्रमा सुधार आएको उनको भनाइ थियो । मित्रनगर विकास तथा सुधार समितिका अध्यक्ष विष्णु पोखरेलले ७ लाख ६५ हजार रुपैयाँ लागतमा मित्रनगर क्षेत्रमा २२५ बिरुवा रोप्न लागिएको बताए । ‘हरियाली मित्रनगर निर्माणका लागि वृक्षरोपण गर्न लागेका हौं,’ उनले भने । 

समितिले चक्रपथ क्षेत्रमा वृक्षरोपण गर्ने भने पनि चक्रपथ विस्तारका क्रममा रुख काटिने भएकाले मित्रनगरभित्र वृक्षरोपण गर्न लागेको समितिका उपाध्यक्ष गंगा पन्तले जानकारी दिए । मित्रनगर विकास तथा सुधार समितिले आगामी दिन नयाँ बसपार्क क्षेत्र वरपर ६०० बिरुवा रोप्ने योजनासमेत बनाएको छ ।

विक्रम संवत् २०६४ मा स्थापना भएको समितिले मित्रनगर क्षेत्रको विकास र सुधारका लागि काम गर्दै आइरहेको छ ।