काठमाडौं– प्रधानमन्त्री केपी शर्मा ओलीले देश विकासका लागि सरकार नयाँ संकल्पका साथ अघि बढेको बताएका छन् ।

राष्ट्रिय विकास समस्या समाधान समितिका अध्यक्ष समेत रहेका ओलीले समितिको आइतबार बसेको ४६औं बैठकलाई सम्बोधन गर्दै विकास तीव्र गतिको चरणमा देश प्रवेश गरिसकेकाले सबै पक्ष रचनात्मक ढंगले अघि बढ्नुपर्ने बताए ।

राजनीतिक संरक्षणका बलमा निर्माणसम्बन्धी ठेक्का दिने परिपाटी विगतमा रहेको र त्यस्ता कमजोरीले देश पछि परेको भएपनि अब त्यस्तो परिस्थिति नरहने प्रधानमन्त्री ओलीले पस्ट पारे । समयमा काम सम्पन्न नगर्ने ठकेदारलाई अब मौका नदिइने प्रधानमन्त्रीको भनाइ छ ।

अन्तिम मौका पनि गुमाउने निर्माण व्यावसायीसँग कडाइ गर्दै ठेक्का तोड्ने मात्र होइन, त्यस्तालाई दण्डित गर्ने र क्षतिपूर्ति भराएर भविष्यमा समेत अयोग्य ठहरिने गरी कालोसूची वा डार्क लिस्टमा राख्नुपर्ने उनले बताए ।

‘त्यस्ता ठकेदारका कारण देश कति समय पछाडि पर्‍यो ? बाटो घाटोको अभावमा सामाजिक जागरण र आमजनताको सुविधाको विषय कति पछि पर्‍यो ?’ बैठकमा प्रधानमन्त्री ओलीले प्रश्न गरे ।

कुखुराको माऊले पखेटामुनि संरक्षण दिएपछि चीलले समेत चल्ला समात्न नसक्ने दृष्टान्त दिँदै प्रधानमन्त्री ओलीले अब ठेकेदारहरूलाई राजनीतिक संरक्षण दिएर जोगाउने अवस्थाको अन्त्य हुने स्पष्ट पारे ।

‘जनताले हाम्रो पार्टीलाई ठूलो अपेक्षाका साथ बहुमत दिएका छन्, यो सरकार जनताको आकांक्षा पूरा गर्नै पर्ने विशेष अवस्थामा अगाडि बढिरहेको छ,’ प्रधानमन्त्री ओलीले भने ।

जनता आफैं तत्पर नभए देश बन्दैन भन्ने कुरा जनतालाई नै बताएर समृद्धितर्फ अघि बढ्न प्रेरित गर्नुपर्ने उनको भनाइ थियो । बताउँदै प्रम ओलीले आम जनता बीच जागरणको लहर सिर्जना गर्नुपर्ने बताए ।

‘हामीले पपुलिस्ट काम होइन दिगो विकासका काम गर्नु पर्दछ । हामीले आमजनताका बीच जागरणको लहर सिर्जना गर्नुपर्दछ,’ उनको भनाइ थियो ।

उक्त अवसरमा प्रधानमन्त्री र योजना अयोगका उपाध्यक्ष डा. पुष्प कंडेल, राष्ट्रिय पुननिर्माण प्राधिकरणका प्रमुख कार्यकारी अधिकृत सुशील ज्ञवाली एवं लगानी बोर्डका प्रमुख कार्यकारी अधिकृत महाप्रसाद लामिछानेबीच कार्य सम्पादन सम्झौता पनि सम्पन्न भएको थियो ।