काठमाडौं– सत्तारूढ दल नेपाल कम्युनिस्ट पार्टी (नेकपा)का अध्यक्ष पुष्पकमल दाहाल 'प्रचण्ड'ले मिठा मिठा कुरा बोल्नुको अर्थ नरहेको बताएका छन् । 

कम्युनिस्ट नेतृ सहाना प्रधानको पाचौं स्मृति दिवसको अवसरमा पार्टी कार्यालय धुम्बाराहीमा आयोजित कार्यक्रममा बोल्दै प्रचण्डले यो अवस्थामा धेरै बोल्नु अर्थहीन हुनु बताएका हुन् । 

'भन्न त मिठा मिठा कुरा भन्न सकिने रहेछ, तर त्यसको अर्थ छैन,' प्रचण्डले भने, 'हिजोका तानाशाहले पनि विकासको मूल फुटाउने कुरा गर्थे, तर मूल त फुटेन । अहिले पनि जनताले हामीबाट कामको अपेक्षा गरेका छन् । बोलेर मात्र देश अघि जाँदैन ।' 

पार्टी पुनः अर्को आन्दोलन र मिसनमा जानुपर्ने भन्दै प्रचण्डले त्यसका लागि विशाल फौज बनाउनुपर्ने बताएका छन् । नेकपाले देशलाई नयाँ युगतिर लैजाने र समाजवादी क्रान्तिको तयारी गर्ने काम गरिरहेको प्रचण्डको दाबी थियो ।