काठमाडौं – भारतको पञ्चकूलास्थित एक अस्पतालमा ५९ वर्षीय वृद्ध राम मेहरलाई एमआरआई मशिनमा राखेर प्राविधिकले बिर्सिएको घटना सार्वजनिक भएको छ । 

उनलाई मशिनभित्र छोडेर प्राविधिक एकातिर हिँडेपछि रोगीले निकै हात पाउ चलाए र पेटी बाँधेको हुँदा उनले हलचल गर्न सकेनन् । अब ज्यानै जान्छ भन्ने लागेपछि उनले निकै बल लगाए अनि पेटी चुँडियो र उनी मशिनबाट बाहिर निस्किए । 

पीडितले कर्मचारीहरूबाट गम्भीर लापरवाही भएको भन्दै प्रहरी चौकीमा उजुरी दिएका छन् । उजुरीमा उनले आफू ३० सेकेन्ड अझै बाहिर ननिस्केको भए मर्ने कुरा उल्लेख गरे । 

सेन्टर इन्चार्ज अमित खोखरले भने रोगी आफैं समयअगावै मशिनबाट बाहिर निस्किएको बताए । उनले भने, ‘मैले प्राविधिकसँग कुरा गरें । रोगीलाई २० मिनटको स्क्यान गर्नुपर्ने थियो । प्राविधिकले अन्तिम तीन मिनटको सिक्वेन्स लिनुपर्ने थियो र अन्तिमको दुई मिनट बाँकी थियो । रोगी यसक्रममा निकै आत्तिए र हल्लिन थाले । उनलाई हल्लिन मनाही गरिएको थियो । एक मिनट बाँकी रहँदा प्राविधिकले रोगी आधी जति बाहिर आएको देखे । अनि प्राविधिकले नै रोगीलाई बाहिर निकाले ।’

प्रहरीले घटनाको छानबिन गरिरहेको छ ।

एजेन्सी