काठमाडौं – सूचनाको हकको अन्तर्राष्ट्रिय दिवसका सन्दर्भमा साताव्यापी नागरिक अभियान सोमवारबाट शुरू भएको छ । 

अभियानका अवसरमा नागरिक संघसंस्था तथा सूचनाको हकका अभियन्ताले सामूहिक रुपमा देशव्यापी अभियान तथा कार्यक्रम सञ्चालन गरी दिवस मनाउँदै छन् ।

यसैक्रममा सूचनाको हकको लागि लामो समयदेखि अभियान चलाउँदै आएका नागरिक संस्था फ्रीडम फोरमको संयोजनमा सातै वटा प्रदेशका मुख्यमन्त्री तथा मन्त्रिपरिषद्को कार्यालयसँग सोमवार सूचना माग गरी अभियान शुरू गरिएको छ ।  

प्रदेश सरकार अन्तर्गत पर्ने विभिन्न सार्वजनिक निकायको जानकारी तथा सो कार्यालयमा सूचना अधिकारी तोके/नतोकेको विवरणसहित ६ वटा बुदाँमा केन्द्रित रहि सूचना माग गरिएको छ ।

फ्रीडम फोरम मार्फत सूचनाको हकका अभियन्ता सञ्जीव घिमिरे र आदित्य दाहालले संयुक्त रुपमा माग गरेको सूचनामा प्रदेश सरकार अन्तर्गतका सार्वजनिक निकायबाट सूचनाको हक सम्बन्धी ऐन कार्यान्वयन गर्दै स्वतः सार्वजनिक गर्नुपर्ने सूचना प्रवाह गरे/नगरेको जानकारी समेत माग गरिएको छ ।

सूचनाको हकको संरक्षण, प्रचलन र प्रर्वद्धनका लागि प्रदेश सरकारले कुनै निकाय वा संरचना बनाएको छ/छैन, सूचनाको हक सम्बन्धी प्रदेश कानून तर्जुमा भएको छ/छैन, प्रदेश सरकार भित्रका स्थानीय तहमा सूचनाको हक कार्यान्वयनको लागि प्रदेशले कुनै समन्वय वा निर्देशन गरेको छ/छैन उल्लेख गर्दै अभियानकर्मीद्वयले सोबारे प्रमाणित सूचना माग गरेका छन् ।

हरेक वर्षको २८ सेप्टेम्बरलाई लक्षित गरी नेपालमा फ्रीडम फोरम लगायतका संघसंस्थाले विगत १ दशकदेखि सूचनाको हकको अन्तर्राष्ट्रिय दिवस मनाउँदै आइरहेका छन् । अभियानको मुख्य उद्देश्य सूचनाको हकबारे नागरिक चेतना अभिवृद्धि गर्ने, शासकीय मामिलामा नागरिकका सरोकारबारे प्रश्न गर्ने तथा सबै सार्वजनिक निकायलाई सूचनाको हक सम्बन्धि दायित्व पूरा गर्नका लागि दबाब सिर्जना गर्नु रहेको अभियन्ता आदित्य दाहालले बताए ।