काठमाडौं – ऊर्जा, जलस्रोत तथा सिँचाइमन्त्री वर्षमान पुन ‘अनन्त’ जापान भ्रमणमा जाँदै छन् ।

जापानी विकास नियोग (जाइका) को निमन्त्रणामा मन्त्री पुन सोमवार साँझ ४ दिने जापान भ्रमणमा जान लागेका हुन् ।

जापान भ्रमणमा जानुअघि ऊर्जामन्त्री पुनसँग जापानी राजदूत मासामिची साइगोले शिष्टाचार भेटवार्ता गरेका छन् । सिंहदरबारस्थित ऊर्जा मन्त्रालयमा सोमवार भएको भेटवार्तामा द्विपक्षीय हितका साथै ऊर्जा र जलस्रोतको क्षेत्रमा गर्न सकिने सहकार्यका विषयमा छलफल भएको थियो । भेटमा मन्त्री पुनले भ्रमणबाट २ देशको मित्रता र आपसी सहयोगमा टेवा पुग्ने विश्वास व्यक्त गरे ।

जापानी राजदूतले भेटमा मन्त्री पुनको जापान भ्रमण र त्यसका ऐजेण्डाबारे छलफल गरेका थिए । ऊर्जामन्त्री पुन नेपाल विद्युत् प्राधिकरणका कार्यकारी निर्देशक कुलमान घिसिङसहित सोमवार राति जापानको ओसाका जाने कार्यक्रम छ ।

जापान भ्रमणको क्रममा मन्त्री पुनले जापानको लिवरल डमोक्रेटिक पार्टीका महासचिव निकाई टोसिहिरो, जाइकाका उपाध्यक्ष हिरोसी कातो, जापानको कृषि तथा वन मामिला सम्बन्धी मन्त्री इटो योशिताका, जापानको परराष्ट्र मन्त्रालयका उच्च अधिकारीका साथै नेपाल–जापान पार्लियामेन्टिरियनस फ्रेन्डशिप लिगका अध्यक्ष सहितका पदाधिकारीसँग भेटवार्ता गर्ने कार्यक्रम छ । 

उनले जापान भ्रमणको क्रममा नेपालको जलविद्युत् क्षेत्रको सम्भावना र लगानीबारे समेत जापानी लगानीकर्तासँग अन्तर्क्रिया गर्ने कार्यक्रम छ । कार्यक्रममा फुजी र कान्साई लगायतका विश्वप्रख्यात कम्पनीको समेत सहभागिता रहनेछ । त्यसका साथै जापानमा बसोबास गरिरहेका नेपाली समुदायसँग समेत समृद्ध नेपाल निर्माणमा ऊर्जाको महत्व र प्रवासी नेपालीको भूमिका विषयक अन्तर्क्रिया कार्यक्रममा आफ्ना धारणा राख्ने कार्यक्रम रहेको मन्त्री पुनको सचिवालयले जनाएको छ ।

मन्त्री पुनले जाइकाका उपाध्यक्षसँगको भेटमा जाजरकोटमा रहेको ४१७ मेगावाटको नलसिङगाड जलविद्युत् परियोजनालाई अन्तिम टुंगो लगाउने विषयमा समेत छलफल गर्नेछन् । नेकपाका नेता समेत रहेका मन्त्री पुनको भ्रमण परियोजनालाई अघि बढाउने विषयमा केन्द्रित हुनेछ ।

नलसिंङगाड परियोजना जाइकाले पीपीपी मोडेलमा अध्ययन गरिरहेको छ । परियोजनालाई अघि बढाउने विषयमा छलफल गर्न उर्जामन्त्री पुन जापान भ्रमणमा जान लागेका मन्त्री पुनका स्वकीय सचिव दुर्गा चापागाईले जानकारी दिए । मन्त्री पुनले यसअघि पनि जापानी राजदूत साइगोसँगको नलसिंङगाड जलविद्युत् आयोजनालाई अघि बढाउने विषयमा छलफल गरेका थिए ।