'वार' फिल्म समीक्षा : बबाल एक्सन, राम्रो टाइमपास

असोज १५, २०७६

काठमाडौं – हृत्तिक रोशन र टाइगर श्रोफको फिल्म वार बुधवार सार्वजनिक भएको छ । फिल्ममा जासूसी कथा, भव्य एक्सन सिक्वेन्स र सुन्दर डान्स मुभहरू हेर्न पाइन्छ । 

कबीर (हत्तिक रोशन) र खालिद (टाइगर श्रोफ) भारतीय जासूसी संस्थामा गुरु र चेला हुन्छन् । फिल्ममा कबीर विद्रोही बनेको शुरूमै देखाइन्छ । उनी संस्थाका उम्दा कर्मचारी हुन् तर बाटो भड्किएर मान्छे मार्दै हिँड्न थालेका छन् ।


ADVERTISEMENT

उनले जासूसी संस्थाका महत्त्वपूर्ण सदस्यका साथै भारतीय सेनालाई पनि तारो बनाइरहेका छन् । खालिदले कबीरलाई गुरुका रूपमा हेर्छन् र उनलाई नै कबीर नियन्त्रणमा ल्याउने जिम्मेवारी दिइन्छ । 

फिल्मको पहिलो हाफको धेरैजसो भाग फ्ल्याशब्याकमा जान्छ । त्यसमा कबीर र खालिदको भेट कसरी भयो र उनीहरूले कसरी सम्बन्ध अघि बढाए भनेर देखाइएको छ । उनीहरू सँगै लड्छन्, शाब्दिक झगडा गर्छन्, आतंकवादीहरूलाई परास्त गर्छन् र नाच्छन् पनि । 

फ्ल्याशब्याकमा अनकौं एक्सन पीसहरू छन् र हृत्तिक अनि टाइगर दुवैले उम्दा प्रस्तुति दिएका छन् । चेज सिक्वेन्स र डान्स मुभ दुवैमा हृत्तिक र टाइगरले एकअर्कालाई टक्कर दिएका छन् । हृत्तिकको स्व्यागसँगै बूढ्यौली आउँदै गरेको पनि देखिन्छ जुन जँचेको पनि छ । टाइगर गम्भीर अभिनेता हुन् र उनलाई दर्शकले मन पराउँछन् । 

फिल्मको कथा चाहिँ खासै केही छैन । निर्देशक सिद्धार्थ आनन्दले फिल्मको सबै ऊर्जा हृत्तिक, टाइगर र एक्सन सिक्वेन्समा खर्च गरिएको छ । फिल्मकी नायिका वाणी कपूर त फिल्मको दोस्रो हाफमा मात्र आउँछिन् । 

कबीर मिसनमा हुँदा नैना (वाणी कपूर) लाई भेट्छन् । उनको भूमिका एकदमै छोटो छ किनकि फिल्मको पूरा ध्यान नै हृत्तिक र टाइगरमा छ । 

फिल्मको दोस्रो हाफमा जर्बजस्ती ट्विस्ट र शक छन् । कथानकमा अलिक ध्यान दिएर हेर्नुभयो भने फिल्मको ठूलो ट्विस्ट निकै अगाडि नै थाहा पाउनुहुन्छ । फिल्म अघि बढ्दै जाँदा दर्शकलाई आश्चर्यचकित बनाउने आवश्यकता झन् बढ्दै जान्छ । 

फिल्मको कथा अलि अविश्वसनीय लाग्दै गएपनि दर्शकले पत्याउँछन् किनकि यसलाई निकै राम्रो गरी बनाइएको छ । सिनेमाटोग्राफी, पार्श्व संगीत र भव्य डिजाइनले हलमा गएर फिल्म हेर्नुको वास्तविक मज्जा दिन्छ । 

टाइगर र हृत्तिकले फिल्मले हेर्न लायक बनाइदिएका छन् । दोस्रो हाफमा एक्सन सिक्वेन्सहरू निकै प्रभावशाली छन् । फिल्ममा एक्सन, स्व्याग र ब्रोमान्स भरपूर छ । यो त्यति स्मार्ट फिल्म त हैन, तर गजबले टाइमपास चाहिँ गराउँछ ।

फर्स्टपोस्टमा प्रकाशित समीक्षा
 

असोज १५, २०७६ मा प्रकाशित

प्रतिक्रिया दिनुहोस