सुर्खेत – दशैं मनाउन गाउँ फर्किनेहरूको चाप सुर्खेतमा पनि निकै देखिन थालेको छ । रोजगारी तथा पेशा व्यवसायका क्रममा प्रदेश राजधानीमा रहेकाहरूसँगै देशका विभिन्न शहरबाट सुर्खेत हुँदै फर्किनेहरूको चाप देखिएको हो ।

वीरेन्द्रनगरबाट आसपासका विभिन्न जिल्ला तथा सुर्खेतकै ग्रामीण क्षेत्रहरूमा जान टिकट पाउन पनि निकै मुस्किल परिरहेको छ ।

कालिकोटको सान्नी त्रिवेणी घर भएका मनोज शाही बिहीवार घर फर्कन भन्दै बसपार्कमा आए । उनी आएको बेला सबै गाडीको सिट बूकिङ भइसकेको थियो, यतिसम्म कि मुडामा बसेर जान्छु भन्दा पनि पाएनन् ।

‘म बिहान ९ बजे आएको थिएँ, तर गाडीमा सिट नै मिलेन, अब शुक्रबार फर्किन्छु । शुक्रवारका लागि टिकट बूक गरें,’ शाहीले भने ।

सल्यानको कालिमाटी गाउँपालिकाकी रिता शाही मध्यपश्चिमाञ्चल विश्वविद्यालयमा अध्ययनरत छिन् । उनी पनि बिहीवार घर जान पाइनन् । ‘टिकटका लागि हिजो नै आउनुपर्ने रहेछ, १७ गते नजाने भनेपनि बाध्य भएर सोही दिन जानुपर्ने अवस्था सिर्जना भएको छ ।’ 

सवारी साधन कम भएका कारण समस्या भएको उनको दुखेसो छ । व्यवसायीहरूले भने छोटो दूरीका यात्रुलाई लिन मानिरहेका छैनन् ।

छोटो दूरीमा यात्रा गर्नुपर्दा समस्या भोग्नेमध्ये एक हुन्, आठबीस– ६ दैलेखका खगेन्द्र शाही ।

‘आठबीस नगरपालिकाको राकम कर्णाली जानुपर्ने थियो, तर टिकट काट्दा कालिकोटको जितेगडासम्मको नै काट्नुपर्ने भयो,’ उनले गुनासो गरे ।

गाडीको अन्तिम गन्तव्यसम्मको टिकट नकाटेमा जान पाइने अवस्था छैन । छोटो दूरीमा पनि पूरानै दररेटमा लैजानुपर्ने उनको माग छ ।

‘जुम्ला वा कालिकोटको भाडा तिरे मात्र जान पाइन्छ, यसलाई कसले नियन्त्रण गर्ला खोइ ?’ उनले भने, ‘जहाँ पनि मनपरीतन्त्र कायम गर्न खोजिएको छ । निर्दोष यात्रु ठगिन बाध्य भइरहेका छन् । सरकारले यस्तो गर्नेलाई कारवाही गर्नुपर्छ ।’

यता, देउती नागरिक यातायात प्रालिका अध्यक्ष कमल खड्का जुनी भने कसैलाई नठगिएको दाबी गर्छन् । ‘गाडी अभाव हुनु ठिकै हो, हामीसँग भएका सबै गाडी बिहानै भरिन्छन्,’ उनले भने, ‘दैलेख–सुर्खेत रूटमा चल्ने गाडीलाई पनि कर्णाली राजमार्ग रूटमा चलाउन शुरू गरेका छौं ।’

कसैले यात्रुलाई ठगेको पाइए आफूलाई खबर गर्न उनको आग्रह छ ।

‘हामी सेवा दिन खोज्छौं, सेवा दिने क्रममा केही तलमाथि हुनसक्छ, तर त्यसरी ठगिएको भन्ने त मलाई लाग्दैन,’ उनले भने, ‘कोही कसैले त्यस्तो गरेको भए मलाई खबर गर्नुहोला, कारवाही गर्न तयार छौं ।’