काठमाडौं – हलिउड फिल्म जोकर सार्वजनिक भएपछि विवाद निम्तिएको छ । केही देशका सिनेमाघरमा दर्शकहरू फिल्म एकदमै हिंस्रक भएको भन्दै पूरै नहेरी निस्केका छन् । 

फिल्मले पैसा चाहिँ बेस्सरी कमाइरहेको छ । सप्ताहान्तमा उसले कुल नौ करोड २० लाख डलर कमाउने अपेक्षा गरिएको छ । 

तर केही दर्शकलाई चाहिँ यो फिल्म डार्क र अतिहिंस्रक लागेको छ । फिल्ममा योआक्विन फिनिक्सले आर्थर फ्लेकको भूमिका निर्वाह गरेका छन् । कसैले नपत्याइएका क्लाउन मानसिक समस्या बढ्दै गएपछि हिंस्रक बनेको कथा यसमा देखाइएको छ । 

एक दर्शकले ट्विटरमा लेखे, ‘जोकर हेर्दाहेर्दै हलबाट बाहिर निस्किएँ । असाध्यै तर्साउने रहेछ अनि फिल्मले बन्दूकबाट हुने हिंसा र मानसिक समस्यालाई ग्ल्यामराइज गरेको छ ।’

केही अन्यले हलमा यस फिल्ममाथि प्रतिबन्ध लगाइनुपर्ने माग गरेका छन् । यसले हिंसाको प्रवर्द्धन गर्ने र सामूहिक गोलीकाण्डका लागि प्रेरित गर्न सक्ने समेत बताइएको छ । 

तर अहिलेसम्म हलहरूमा हिंसाको कुनै पनि घटनाको खबर आएको छैन । अमेरिकामा प्रहरी उच्च सतर्क स्थितिमा छ र हलहरूमा सुरक्षा बढाइएको छ ।

क्यालिफोर्नियाको हन्टिङटन बीचमा धम्की आएपछि एउटा हलले दुईवटा शो रद्द गर्नुपरेको प्रहरीले बतायो । तर शुक्रवारका शोहरू निर्धारित तालिकाअनुसार नै देखाइए । 

न्युयोर्क शहरमा एउटा हलमा एक दर्शकले फिल्ममा जोकरले कसैलाई मारिरहेको देखाएपिच्छे अरूलाई थुक्ने अनि चर्को आवाजमा थपडी बजाउने काम गरेर डरत्रास उत्पन्न गराए ।

उनको उद्देश्य खराब रहेको डर मान्दै प्रहरीले उनलाई हलबाट बाहिर निकालेको थियो । ती व्यक्तिले फिल्म शुरू हुनुअघि आफ्नो लिंगमा टकिलाको एक बोतल खन्याएको आफूले देखेको एक प्रत्यक्षदर्शीले बताए । 

एजेन्सी