एजेन्सी- भारतीय क्रिकेट टीमका कप्तान विराट कोहलीले एक नयाँ कीर्तिमान बनाएका छन् । विराट पहिलो भारतीय कप्तान बनेका छन् जसले दक्षिण अफ्रिकाको टीमलाई 'फलोअन' खेल्न बाध्य बनाए । 

पुणे टेस्टको दोस्रो दिन भारतले कप्तान विराट कोहलीको दोहोरो शतकको दममा ६०१ रन बनाएको थियो । यसपछि दक्षिण अफ्रिका पहिलो पारीमा २७५ रनमै समेटियो । र भारतले फलोअन गर्न बाध्य बनायो । 

दक्षिण अफ्रिकाविरुद्ध तीन म्याचको सिरिजको दोस्रो टेस्ट जारी छ । विराट कोहलीले कप्तानको रूपमा ५० औं टेस्ट खेले । कोहलीले यस म्याचको  पहिलो पारीमा आफ्नो सर्वश्रेष्ठ टेस्ट पारी खेलेर यादगार बनाए । उनले २५४ रन बनाएका थिए । त्यसपछि उनले दक्षिण अफ्रिकालाई फलोअन गर्न लगाएर इतिहास बनाए । विराट कोहली दक्षिण अफ्रिकाको टीमलाई फलोअन गराउने पहिलो भारतीय कप्तान पनि बनेका छन् । 

भारतका लागि सबैभन्दा बढी टेस्ट म्याच जिताउने कप्तानहरू मोहम्मद अजहरुद्दीन, सौरव गांगुली र महेन्द्र सिंह धोनीले पनि यस्तो चमत्कार गर्न सकेका थिएनन् ।